قصيدة " وياك انا العروبية " - عمر الكرمي

بني يازغة الجمعة, ديسمبر 23, 2016
قصيدة " وياك انا العروبية " - عمر الكرمي

وياك انا العروبية
ساكنة فالجبل والقرية
كانفتاخر بجدي بولحية
مول السلهام والشاشية
دي خوا البلاد من الروم

***
وياك انا العروبية
رباتني يما من صغري
النقاوة ونمشط شعري
نعاسي وفياقي بكري
راجلي حياتي عمري
نشاركو الافراح والهموم

***
وياك انا العروبية
وصاتني يما نحترم
ونقول كلام مسگم
لباسي كلو محتشم
الطويل والدرة والكم
قدام الخوال والعموم

***
وياك انا العروبية
نوض بكري نحلب ونعجن
ها الملوي ها المسمن
وفالحلاوي كانتفنن
الزيت والسمن ارا ماتدهن
كولشي كايخرج مگهوم

***
وياك انا العروبية
واخا الفلط والعرا
واخا الفرط والقهرة
والشمس سخونة حرة
كانقز كيف الهرة
ويستر الحي القيوم

***
وياك انا العروبية
كاتقولو هادي نية
ماتعرفشي شي جمعية
ماتعرفشي شي تنمية
كابرة وسط الهندية
عارفة غير الحلفة والدوم

***
وياك انا العروبية
قارية وشديت الباك
ناجحة وفايتة لافاك
ماوصلتاش حتا يماك
خارجة وتدور بالصاك
وجلالا عامر حموم

***
وياك انا العروبية
كاتقولو هادي هبلة
عارفة من الصنايع شللا
عارفة الدين والملة
وعارفة اش فقاع السلة
بسباب عرفي زهري محروم

***
وياك انا العروبية
كاتعرفكوم وحدة وحدة
ها دي ربات ولادا
وها دي بغات السعادة
عل الطمع باعت بلادا
ونسات حقوق المظلوم

***
وياك انا العروبية
ماتقولو غي الما والضو
راه دبا كولشي عندو
شوف المسكين طايب جلدو
حاير فالصاير تقاضا جهدو
كايذوب يوم علا يوم

***
وياك انا العروبية
عايشة بالصفا والنية
ماتيقوشي فالدنيا
كاتقلب كيف الحية
والحاكم يصبح محكوم

شاهد أيضا:



commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »