قصيدة (باغي نعمر الدار) على الطريقة اليازغية.. لمحمد اليازغي (ارطيلي)

قصيدة (باغي نعمر الدار) على الطريقة اليازغية..

كنهديها لكل اليازغيين والملاحيين بالخصوص..

نتمنى تنال اعجابكم...

باغي نعمر الدار

باغي نعمر الدار ، باغي نعمر الدار ،

باغي نعمر الدار ، جابوهالي ملاحية.(اللازمة)

بني يازغة فاش خاطري يزهى
ونبدا نعرق من الجبهة

تراب بلادي كنشهى
ريح بلادي عزيز عليا.

ركبنا فالطوموبيل وقصدنا ملاحة
فاين صبت لقلبي الراحة

عمرو عيناي تفاحة
وقلت يا ربي تكتبَها ليا.

قلبي رشقلو ورتاح
وقلت فنفسي هذِك دي تصلاح

غير طُوّح يا الطواح ودير شي مزية.

شهبة من حروفَها
حليب كايتصفى

شوفة تابعة شوفة وانا عقلي تلف عليا.

نطلب من اللّٰه يصبر لي قلبي
غرامَها رشى لي عظمي،

وهزيت كفوفي وقلت يا ربي
تقرَنِّي بالملاحية.

ملاحية دمَّها من دمي
من هذا شحال كان حلمي،

يازغية نعبيها ياو بعدو مني
الى تجرى شي مصيبة ليا.

واد سبو صورو ربي
قالو سقي لي عبدي،

فرّح البكمة ورضي
على ملاحة كوز بالنية.

جراف و جبال مزيانة
وناسَها بالفلاحة فرحانة،

فالعزف والگندول سرحانة
حامدين الله فالدنيا.

باغي نعمر الدار ونكمل ديني
واجب هذا ماشي غير خليني،

يبارك لي ربي ويهنيني
فالدنيا وفالاخرة حتى هيَ.

فرحلي يا يمَّا باغي نعمر الدار
حتى يانا شكوكدت ورجعت من الكبار

خيرك ماننساه حاشا من العار
ياربي يخليك ليا.

الجواج مصير و لابد
ماشي غير اجي وقول نبدا

راها الرزانة فاش العَمدة
هذا دي خلاني نجيبَها يازغية

باغي نعمر الدار الحصير والبطانية
الزيتون والزيت البلدية

عادة من جدودي وصية
وهذَاك فاش راحتي وهنايا.

باغي نعمر الدار انا بها راضي
لا تعكس لي عفاك اسيد القاضي

هذِك فالدنيا مرادي، حبي ونور عينيا.

يا العالم بعبدك غير فقير
راه ما ناوي غير الخير

يا ستار يا موزع الاقدار يا القدير
تسهل يا اولى الاوليا.

* محمد اليازغي (ارطيلي)

بني يازغة