قصيدة "القدس" - الشيخ محمد تافراوت

بني يازغة الأحد, ديسمبر 10, 2017
قصيدة "القدس" - الشيخ محمد تافراوت

اخواني اخواتي الاعزاء، نقدم لعشاق الشعر الزجلي من التراث المحلي، قصيدة بعنوان "القدس" للشيخ الواعد والمحبوب سي محمد تافراوت من الدار الحمرا منطقة اهرمومو وبويبلان، اتمنى ان تروق اعجابكم.. 

اياااا القدس ارض الله والانبيا
ترااابك عزيز وغالي عل السبايبيا
امااا نقدرشي بين صباح وعشية
يجي صهيوني ويبدلك السمية
ويديييرها عاصمة ويهزها لارضو

ويا القدس ارض الشرفا وارض لجدود
اماااا نسمحشي فيه يخربوه ليهود
ايلااا عطاونا الطريق السلاح موجود
نمشيو بالراجمة نحطمو الحدود
الله ينصرنا ويكملنا المقصود
حتا الجهاد علينا فالكتاب فرضو

اياا القدس ارض الشرفا وارض الاسلاف
اما نسمحشي فيك يوسخوك الاجياف
ايلا تاحدنا باقيين الرجال بزاف
دي فيهم الغيرة كاتاكلم نار العدو

ويا القدس ارض الشرفا وارض الاحرار
يستاهل نطيحو ونموتو عليه بالنار
ولا نحرقو ليهودي دي عطا القرار
بغا يردو عاصمة بين ليل ونهار
ويبيين الرجلة دي ماصابشي فجدو

ويااا القدس ارض الله والمعجزات
ايلا سمحنا فيه علينا القوم ضحكات
نحييدو الجلالب ونحييدو الرززات
ونعلقو السيوفا راها حفات ورشات
وما بقاو رجال يولدوهم المسلمات
ملي ارجع بن سعود يبوس يد سيدو

ويااا القدس عربي ماعليك هضرة
غالي ترابك ما هو لا للبيع وشرا
اما نزيدوشاي جراحو عل المگزرة
دي درت يا شارون فشاتيلا وصبرا
ا مات هو والضربة مابغات تبرا
حتا نخلفوها من اولاد ولد ولدو

جريمة قتل تكسر سكون شتاء مدينة المنزل

بني يازغة الجمعة, ديسمبر 01, 2017

شهدت مدينة المنزل، ليلة الخميس- الجمعة 30 نونبر 2017، حسب مصادر فيسبوكية، شجارا دمويا نشب بين شابين من المنطقة. 

وقد دخل الشابان، حسب ذات المصادر، في مشادات كلامية بأحد المقاهي بالمدينة والتي سرعان ما تحولت إلى اشتباك بالأيدي حيث تدخل بعض الحاضرين و قاموا بفض النزاع، و عندما خرج الضحية من المقهى مغادرا نحو منزله تربص به المتهم و وجه له طعنة قاتلة بالسلاح الأبيض على مستوى القلب فسقط مدرجا في دمائه فيما فر الجاني إلى وجهة مجهولة. 

هذا و قد تم إبلاغ رجال الدرك الملكي الذين حضروا لعين المكان لمعاينة الضحية وتم  استدعاء سيارة الإسعاف التي نقلته صوب المستشفى الجامعي الحسن الثاني بفاس حيث لفظ أنفاسه الأخيرة صباح اليوم الجمعة. 

و جدير بالذكر أن الضحية و المتهم  كانوا أصدقاء قبل وقوع هذة الجريمة المأساوية، و لحد الآن لم تحدد الأسباب و الدوافع التي كانت وراءها. 

أمال اليازغي - أن تكون طالبا جامعيا في المغرب..

بني يازغة الخميس, نوفمبر 30, 2017

أن تكون طالبا جامعيا في المغرب... يعني أن تشرب كأس الذل والهوان حتى الثمالة .. لطالما تفاديت الحديث عن هذا الموضوع، ليس لأنه مستهلك أو لا ضير من الحديث عنه ، بل و لأنه لا يمكنك تصور حجم الحنق و الألم اللذان يغزوانني كلما فكرت في الأمر..

 من الصعب سرد الحالة المزرية التي يعيشها الطلبة في المغرب ، ستسألني من أي جهة؟ سأقول لك من كل النواحي؛

نبدأ بالسكن ربما أبناء المدينة الجامعية لا يعانون من هذا المشكل .. لكن الجامعة تحتوي نسبة كبيرة من الطلبة الوافدين من القرى و أيضا المدن الصغرى نصفهم لا يستفيدون من الحي الجامعي ولا نرى أي تدخل ميداني يخص ذلك غير تعاطف بعض الرفاق. 

 المنحة: لا أدري ما قد أقول في ذلك فالطالب المغربي يكلف الحكومة 9 دراهم يوميا؛ بضع دريهمات تكتسي الجيوب ننتظرها بكل لهفة كل ثلاثة أشهر .. هذا إن توفرت لأن أغلب الطلبة لا يستفيدون من المنح إلا من رحم ربه. 

النقل: أما عن ذلك فحدث ولا حرج نجد أن الشركات المشبوهة تعمل على تغطية الخطوط المربحة متجاهلة الخطوط الأخرى، وخصوصا الخطوط التي تخص الجامعة ، و"يعجبونا" بالعناوين المثيرة و الشعارات الفضفاضة الموجودة في صفحاتهم الفيسبوكية (الحافلات x مزودة بخدمة 4ج و أرضية مسطحة لذوي الاحتياجات الخاصة .. إلخ) ، أيضا ثمن التذكرة وجب أن يكون رمزي للطلبة أو أن تكون  المجانية لأن الكل يدرك أن مثل هاته الشركات تتلقى دعما مهما من عدة جهات فلما لا تعمل على إعفاء الطلبة من تأدية ثمن الحافلة؟ أظن ان هذا ليس بالأمر المستحيل ويمكن تحقيقه اذا عملوا على أنسنة نفوسهم إلى حد ما. 

هذه كانت صور مختصرة فقط ولا زالت هناك أشياء أخرى تؤرق النفس أكثر من ذلك كغلاء المعيشة و أسعار الكتب و المطبوعات، وليس هناك حل غير إعادة النظر في كل أمر يخص الجامعة.

مسلسل "حياة" - الحلقة 60

بني يازغة الخميس, نوفمبر 23, 2017
مسلسل "حياة" - الحلقة 60

الحلقة الستون (60) من مسلسل حياة


قولي ا رشيد؟؟  خاك اش واقعلو؟؟  قلبي مامرتاحش، نازل عليا القنط من دي صببح الصبح؟؟ اش كاين؟؟ 
كايتكلم العربي، قاللا ايما راهم كايقولو شي واحد من الدوار مات فالصحرا؟؟؟ 
اسكت ا العربي انتين ما عندك تحقيق؟؟؟ 
واحد الشوية وحميد ماجي كايهرب ويبكي!!!! 
وادخل عليهم؟؟؟، اخالتي منانة جري جري، راه خاي مصطفى مات فالصحرا!!!؟؟؟؟، ويما راهم طييحوها الارياح؟؟  وحياة راها طايحة سخفانة كايرشوها بالما؟؟ راه يالله جا ابا من عند الجدارمية؟؟؟؟ 
منانة مسكينة، كاتغووت غير غوتة وحدة وكاتطرب فركابا؟؟؟ وادخلت علا عروستا خافت عليها، وكاتجبرا كاتبكي بوحدا فالبيت، وكاتقبطا ودررعتا وكاتسككت فيها و غطاتلا جلابتا وهي حللست بليزار ديالا ومشاو للدار دي حياة؟؟؟ 
كايجبرو الجيران تجمعو عل الدار؟؟  والعيالات كايخويو الما علا محجوبة مسكينة اما حياة مشات فالغيبية، وغير جات يماها عملتلا راسا علا ركبتا وبقات مدرعتا وكاتبكي وتنووح؟؟ 
رشيد مشا للمنزل يصيفط الخبار مع شي طاكسي دي بير طمطم لاختو دي مصطفى عيشة هي مزوجة فبني سادن؟؟ 
اما العربي بقا مع عمي المختار علا برا من الدار كايلاقيو العززايا، وكايصبرو فعمي المختار
ا العربي قولي، واش عندك شي عجل مزيان ولا شي عجلة مزيانة رابطة كاتعلف؟؟، سير جيبا انتين وحميد، هادو دي عندي صغار ؟؟؟ لابدا ندبحو شي حاجة كبيرة دي تليق بالكنازة دي مصطفى الله يرحمو؟؟ 
عمي المختار مسكين كايتفكر، غيد ديك المجية د المقدم غير جا لعندو وجبرو واقف قدام الدار وعطاه ديك الورقة فيها داك الطابع الاحمر؟؟؟، شافتو مراتو محجوبة وهو يعملا فقبو؟؟، وغير سولتو قالا غير واحد البروسي دالغابة، وهو مسكين كممدا فقلبو حتا يتييققن من الجدارمية، وايني مراتو محجوبة قلبا مسكينة اعلم علا شي حاجة، قالتلو ما عممرك يا المختار كذبت عليا حتا لهاد المرة،؟؟  قولي اش كاين،؟؟، قاللا بلاتي نوصل للمنزل ونرجع؟؟، و وصصا بنو حميد مايخرجش من الدار حتا يرجع؟؟ 
هاكدا عاشت قبيلة بن يازغة والقبايل دي دايرة بها، ديك الوقت دالحرب، كل نهار كايعاينو يسمعو الخبار دي شي واحد؟؟، العيالات كل وحدة قلبا مخطوف، والعروسات كل وحدة قلبا مكسور، كاتقول هاد النهار يجيني خبارو، رجعو مساكن كايكرهو يشوفو المقدم ماجي لعندم، من بعد ما كانو كايعاينوه يجيب برية ولا ماندا من عند ولادم، مابقاوش باغيين الفلوس،؟؟رجعو باغيين غير ولادم بوجهم العزيز،؟؟؟؟ 
محجوبة مسكينة فاقت وكاتطرب راسا للحيط وتغووت،!! وكاتشرررك فحوايجو،!!! وتقولم بغيت كبدتي، اما حياة مسكينة بقات غايبة نهار وليل، غير النفس دي كاتطلع، وغير فاقت بقات غير مبهوطة!!! كاتتشوف بعيناها، ماكاتهضر ما كاتكلم، ويماها منانة كالسة حداها ما كاتخطاهاش، 
داك النهار هاداك جا الخبار دي بزاف دالشهداء فبن يازغة، تقريبا كل دوار فيها واحد، وشحال وشي وحدين مازالين مفقودين، ماعرفوهم واش ماتو؟؟  ولا محووسين؟؟؟ 
وجا المقدم مرة اخرى، كايقولو لعمي المختار، قالو لكم الجدارمية، تصوورو؟؟ ومراتو حتا هي تتصوور باه تقبطو فلوس العزو، وتبقاو تخلصو عليه،؟؟؟، محجوبة كاتهز حتا للسما وتزدخ للرط؟؟، واش ابني ماشي تصرفوهلي فلوس؟؟ مابغيت تصاور؟؟  مابغيت فلوس، 
اما حياة ماعارفاش اش واقع، مازالة مصدومة، سارقا الحديد؟؟؟ وعباها رشيد خاها للصبيطار وقالولو عبيها لفاس، هادي راها مصدومة،؟؟ 
يتبع...
مسلسل "حياة" - الحلقة 59

مسلسل "حياة" - الحلقة 59

بني يازغة الخميس, نوفمبر 23, 2017
الحلقة التاسعة و الخمسون (59) من مسلسل حياة

ومشا مصطفى ارجع للصحرا يكمل السربيس ديالو، وملي وصل عند صاحبو وانسيبو حسن هو كاين فالمركز بات عندو واعطاه السخرة دي صافطتلو يماه منانة، وبقاو كايتجمعو ،ومصطفى كايعاودلو عل البلاد
ايوا حسن،؟؟هنيالك اخاي؟؟ راه عندك فالطريق شي عزري ولا شي عزبة، ههههه
واش بصح اخاي مصطفى،؟؟؟، الله يرحم لك الوالدين، هادي خبييرة مزيونة، والله اسيدي حتا تستاهل عليها شي زردة؟؟  هههه
ايوا هي منانة راها فرحانة، هههه، راها ماقدتا فرحة، وايني مسكينة مهوولة من جهة حياة؟؟، راحنا مشينا للطبيب وعملتلا يما التجاجة، ايوا عليك يا مولانا،؟؟؟ 
الله يسهل عليكم اخاي مصطفى، انتوما قلبكوم كبير وربي مايخييبكومش
ومشا مصطفى كمل طريقو للحدادة، وارجع للسربيس ديالو
عمي المختار جاب الرملة والسيمة وبدا كايصلح فالبيت وباغي يسقف اعريش دي قالو ابنو، اما حميد هو دي كايخدم مع المعلم البناي، وايني راه وصا يماه محجوبة تداديلو عل العروسة؟؟ 
حياة مسكينة مازالة كاتعاين الاولاد، بحالا بحال اي عروسة جديدة،راها شافت مراة خاها جات من موراها وها هي حاملة، 
رشيد مشا للجامعة واجبر الجو مازال مروون وارجع بحالو، غير وصل للمنزل، كايسمع الدنيا مقلوبة، كولشي مهوول، بن يازغة ارجعت مهيابة والرجال كل واحد فاين كايسول؟؟، كايقولو الحرب فالصحرا كل نهار كايهجمو فجهة، وكايسمعو شي وحدين راهم ماتو، وشي وحدين قبطوهم العديان عندم محووسين؟؟؟ وغير وصل للدار دخل ساكت وماهضرش بحال ايلا ماسمع والو،؟؟، واحد الشوية والعربي داخل كايهرب؟؟
ايما وايما؟؟  حفيظة فايرراها يما؟؟؟ 
غير بشوية ا العربي مالك ماجي كاتغووت، راها كاتعطي التبن للبقرة؟؟، ياك لاباس
الحرب قايمة فالصحرا وكايقولو ماتو بزاف من بن يازغة،؟؟؟!!!!! 
سمعو رشيد،؟؟  وقبطو من كتفو؟؟، اول مرة رشيد كايهز يدو علا خاه اكبر منو؟؟؟ 
ا العربي الله يهديك اش هاد الهضرة كاتقول؟؟، واش هاكدا كايجيبو الرجال الاخبار ؟؟؟واش ماعارفش يماك راه عندا ولدا فالصحرا،؟؟؟  غير تسمعك اش ماشي تقول؟؟؟، ماشي تقول ولدا قتلوه فالحرب؟؟؟؟ 
منانة اسمعت كولشي واسمعت رشيد كيفاش كايهضر مع خاه، وادخلت عليهم بجوج للبيت؟؟؟ 
رشيد راني سمعتكوم؟؟؟  قولي اش كاين؟؟ 
ايما ماكاين والو؟؟؟، رشيد !! مندي دخلت وانتين غير ساكت وحسيت بك مخببع شي حاجة،؟؟  مسانس غير كاتدخل كاتهز هاد البنيتة وتفرح بها ؟؟،وكاتبقا تجمع وتطحك مع مراة خاك سعيدة وانتوما بحال الخوت،؟؟، هاد النهار دخلت وطلقت داك الراديو ومشيت للركنة؟؟ قولي اش كاين بلا ماتخبع عليا؟؟  خاك اش واقعلو؟؟ قلبي ما مرتاحش هاد النهار، نازل عليا القنط من صببح الصبح؟؟؟؟ 
يتبع...
مسلسل "حياة" - الحلقة 58

مسلسل "حياة" - الحلقة 58

بني يازغة الخميس, نوفمبر 23, 2017
الحلقة الثامنة والخمسون (58) من مسلسل حياة

ومشاو مصطفى ورشيد للدار وشحرو واحد البراد داتاي صحراوي، مصطفى دي طييبو قاسح، وجاب لحداه المسجلة، وهو يعطيه رشيد واحد الكاسيطة دي ناس الغيوان، مهمومة
مهمومة واخيي مهمومة
مهمومة وهاد الدنيا مهمومة
هههههه ايييه اخاي رشيد نتوما فديك الجامعة رادينها غير علا الكواسط دي ناس الغيوان وجيل الجيلالة، اما حنا ليهن كانسمعو غير الريح والعجاج كايسوط،؟؟؟ 
المهم غير تمشي لخالتي منانة قوللا توجد ديك السخرة غدا راني ماشي بحالي؟؟ 
ايوا گوز لعندنا لتما ونخرجو ياناوياك راني ماشي نهبط لفاس نشوف اش كاين؟؟ واش اهدنت ياومازالة مروونة
حفيظة طيبت الغذا واحملت بنتا وماشي تعبيه للعربي، راك كايحووط شي زيتون، وينقش عليه
ايوا اش هاد التعطيلة ا حفيظة؟؟ 
ايوا عاد طابت الخبز؟؟  ماكاتعرفشاي العروسة الجديدة ديما شغلا معططل؟؟ 
ارا لاون خويلي نحنجر راه اقتلني بوهيوف؟؟؟ 
نزلتلو حفيظة واحد الطبسيل دالمنگوب و واحد المطلوعة دي فارينة، وجابتلو واحد البررادة داللبن، 
فايرراها ا حفيظة المغيرفة؟؟؟، ياك عارفتني كاناكلم بالمغيرفة،؟؟  لياه نسيتا؟؟ 
ايوا خلاه ا العربي كول ايلا ماشي تاكل؟؟  وانتين ديما عووال تخانق معاي؟؟
هاكدا العربي مع مراتو حفيظة، ديما يتخانقو عل قل هي مسالة؟؟، وايني هي اسانست به وهو اسانس بها، غير كمل الغذا، وجمعت حفيظة وقاللا يا الله نمشبو بحالنا وراجعين كايهضرو ويطحكو بحال ايلا ماواقع والو
مصطفى كايتجمع مع باه المختار عل الدار باغي يصلحو فيها شي بيت ويسقفو اعريش، وباغيين يجووجو خاه حميد، وهادشي كلو غير يرجع فبرمسيون لاخور، اما حياة راها كاتخمم فالخرجة دي مصطفى كيف مسانس كايخرج ويخليها؟؟
هاد المرة مصطفى اخرج واحد الخرجة صعيبة بزاف؟؟  خللا كولشي كايبكي ،حياة بقات فبيتا ماقدرتش تخرج، ويماه كاتسلم عليه فالرروى وتدررع فيه وتبكي، وهو مسكين عطاه الله الصبر، كايصببر فيهم 
اخلاه ايما راني ماشي غير واحد اربع شهور ونرجع، غمط عينك وحللا ها هي گازت، هههه، ونجي ان شاء الله ونعملو العرس لحميد، غير دببر اخاي عل المراة، ايوا بالسلامة عليكم الله يهنيكوم

يتبع..

لمن فاتته الحلقات السابقة، تجدونها على الرابط التالي:
https://goo.gl/24fFS1

هاجس الهجرة - أمال اليازغي

بني يازغة الثلاثاء, نوفمبر 21, 2017
هاجس الهجرة - أمال اليازغي بني يازغة

غايتي الكبرى أن أهاجر

لم أكُن كباقي الأطفال، لم أحلم أبدا أن أصبح طبيبة أو مهندسة كانت غايتي الكبرى أن أهاجر،رغم أنني لم أكن أعي شيء آنذاك إلا و أن فكرة الهجرة راودتني منذ الصغر، بحكم أنني ترعرعت في أحد الأزقة القديمة بفاس (الشرابليين) كنت أرى السياح يتكسعون باستمرار داخل المدينة وتقريبا طوال السنة ؛الشيء الذي جعلني أطرح عدة تساؤلات,

هل هم دائما في عطلة؟

لما لم يأخذني والدي في عطلة خارج البلد أيضا؟ أعرف وضعه المادي جيدا لكن من أين تأتيهم المال للسفر طوال السنة وأبي يعمل طول السنة و لا يأخذنا إلى أي مكَان، أيضَا كنت اُبهر بما تجْلبُ خالتي و أبناء خالي المتغربين، رغم أنهم لم يجلبوا إلا علب من الشوكولاتة و القهوة وبعض الشظايا الآلية التي انتهى منها الاجانب، (رغم صغر سني كنت اعرف أنهم يجمعون ما تبقى من أدوات و ملابس الاجانب ليبيعونهم هنا او يهدونه لعائلتهم فنحن نقبل بكل شيء) كنت أسأل أمي باستمرار عن زمن قدوم خالتي و كم قضيت من الليالي أحلم بالشوكولاتة و أواعد اصدقائي أن اجلب لهم منها وهم أيضا كانوا يسألونني باستمرار عن موعد قدوم خالتي ويعدون الأيام معي.

بعدما كبرت و أصبحت في العشرينات من عمري لم يتغير الحلم بل تغيرت الأسباب ، لست ممن سينافق ويقول:

اللهم قطران بلادي ولا شكلاط بلادات الناس

فالكذب أشد وطأة من الحقيقة الجارحة ، ليس من السهل أن تتمم دراستك و أنت تعي جيدا أنك ستصبح في عداد العاطلين بعد ذلك ، و كيف لك أن تمتهن حرفة و أنت تدري جيدا أن الحرف البسيطة ماتت في حضرة الصناعة و المعامل، زد على ذلك قدوم الصينين و تعميرهم السوق المغربية وكذا ابهارهم الناس بصناعاتهم وايضا ثمنها المناسب، الشيء الذي جعل المغاربة يتهافتون على منتوجاتهم ؛ من سيهتم بعدئذ إلى المنتوجات المغربية و ما مصير الصناعة التقليدية و الحرفة و الحرفي أيضا؟.. العمل في المغرب أصبح شبه معدوم، هناك من يرمي بجثته في البحر، البعض يذهب إلى الجزائر بطريقة غير شرعية لامتهان بعض مهن النقش و الجبص ، وآخرون يفرشون في الأرض سلع سبتة من تحلية و قهوة و أوان بلاستيكية إلى غير ذلك من السلع، يبيعون بحذر كبير وهم في استعداد دائم للهروب.

العمل

لا أدري ما قد يفعله المرء هنا وحتى إن وجد العمل فإن هواجس اخرى تظل تؤرقه مثل الصحة ومستقبل الابناء ، لكن العمل يبقى مقدسا فهو تحقيق للذات وضمان للاستقرار المادي و من الأشياء المهمة التي تحفظ كرامة الإنسان ، وهو العامل الوحيد الذي يدفع الشباب إلى الهجرة والبحث عن حياة أفضل..

مسلسل "حياة" - الحلقة 57

بني يازغة الاثنين, نوفمبر 20, 2017
مسلسل "حياة" - الحلقة 57

الحلقة السابعةو الخمسون (57) من مسلسل حياة

منانة عندا تجربة فالحياة كيفا كيف عيالات الدوار، وغير شافت سعيدة عروستا تبدلت، اعملت شغلا واعرفتا راها حاملة، وبدات كاتبعدا علا حفيظة مراة العربي؟؟، وايني منانة مسكينة هاكداك ومانساتش بنتا حياة؟؟، خاصا حتا هي تقوم تولد، وتدق الاوتاد، وعبات عروستا العزيزة سعيدة ومشات لعند حياة.. 
- ايوا ابنتي يا حياة؟؟، مندرا؟؟ كاينشي ولاد ياو مازال؟؟، ايوا انتينا تجووجت قبل سعيدة، وهي هادا الشهر التاني، وايني الهضرة تبقا هنا راني ماقلتاش لحفيظة، راك عارفة ديك اللفعة الگرطبطة، ماكاتقشعاش وخايفة منا ايلا تعملا شي فضيحة؟؟ ديك الگنس ماعنداش القلب؟؟ 
- مازال ايما ماكاين والو، راها قالتلي خالتي محجوبة نعملك التجاجة؟؟، وقلتلا غير يجي مصطفى نمشيو لصفرو ياو فاس، تما دي كاينين الطببا ونعرفو بعدا مناش؟؟؟ 
- ايوا ابنتي دادي علا راسك؟؟ ماتبقاشي گالسة راه العروسة وتادا هوما ولادا؟؟ 
وهاكداك كان غير جا مصطفى مشات معاه لفاس وگووزو عند الطبيب وخررجلم قوات الدوايات؟؟، وايني هادشي كلو لازم من التجاجة اليازغية المعروفة فالبلاد،عيالات الدوار كولم كايعرفوها
- اخالتي محجوبة،؟؟ قولي بعدا هاد التجاجة كيفاه نعملا؟؟؟ 

- اخلاه يا لهبيلة؟؟ لياه هاديك التجاجة البيطة دي جاب مصطفى من السوق هي دي ماشي تعمل لعندك؟؟، هاديك ابنتي طييبالم ياكلوها هوما، واما ديالك هايانا نقولك كيف تعمللا؟؟ 

- التجاجة ابنتي دي كاتعمل المرا؟؟ هي تقبط شي، عتوقية مازالة مابدات تولد وتطييبا مع البصل والثوم وليبزار لكحل وليبزار الابيط والگوزة وبسيبسا والكعبة وشوييش دالحلبة وحب الرشاد والسمن الحر والزعفران البلدي وشي وريقات دالشيح والسحتر وشي حبيبات دالقصبور وتخليهم يطيبو غير بشوية وتعمل معاهم زيت العود

- غير يطيبو يا بنتي تعشا بيهم وشرب ديك المريقة ديالا ونعس وتغططا مزيان وعنناك يطربك البرد،؟؟ ماتحلش عليك السرجم حتا للصبح، وماتشربش الما موراها

- الله يخلليلك اصحيحتك يا خالتي محجوبة ويطوولتا فعمرك، ايوا حتا نصيفط مصطفى يجيبلي عند يما شي فليلسة هي راها عندا التجاج وراها عارفة وفراسا الخبار

اعملت حياة التجاجة وبايتة كاتعرق وتنشف، حتا للصبح، كيف ماقالتلا عگوزتا

مصطفى من بعد داكشي خرجو كايدورو هو ورشيد نسيبو وكايتجمعو عل الدنيا والشدق د الخبز كل واحد فاين رماتو الاقدار

- والو يا خاي مصطفى انتوما راكوم مهنيين فديك الصحرا بعدا ماماتشوفو هم ماكاتشوفو صداع؟؟، حنا فهاد الجامعة كل نهار الاضرابات والمقاتلة والغوات؟؟ 

- الله يجيبك علا خير يا رشيد، دي عندنا حنا راه ماعرفو غير حنا، الداخل مفقود والخارج مولود، بحال دي داخل للبحر؟؟، وايني الهضرة تبقا بيناتنا، راحنا كانقييلو مع العدو فالحرب،؟؟ 

- واييه اخاي مصطفى كانسمع داكشي فالراديو؟؟ 

- داكشي كتيتقال غير زويتة من لفوق،؟ دي كايعيشو هو دي عارفو،اودي حتانتين راه حتا واحد ما ممطررح، يا الله نمشيو للدار نشربو شي كاس داتاي بالشيبة ومولاها ربي؟ 

يتبع

مسلسل "حياة" - الحلقة 56

بني يازغة الأحد, نوفمبر 19, 2017
مسلسل "حياة" - الحلقة 56

الحلقة السادسة والخمسون (56) من مسلسل حياة


حسن غير كمل برمسيون ديالو وارجع للصحرا، وجاب معاه السخرة دي صاحبو ونسيبو مصطفى، اجبر الخدمة تزييرت بزاف، ملي سوول علا مصطفى،؟؟ قالولو راهم هززوه للحدادة؟؟، والسخرة ديالو صيفطالو مع الكامي، وهنا انقطعت الأخبار بيناتم وهذا ما بقا كايعرف اخبار لاخور؟؟؟

اما حياة؟؟، ارجعت كاتعيش حياتا مع عگوزتا وشيخا ولوسا كيف العادة، وغير كايجي مصطفى، كاتتبدل الحياة ديك العشرين يوم دالفرحة، فيها التهلية وفيها حديث المخدة دي حياة فالليل، وكيف كايقولو حديث المخدة امضى من المقدة؟؟، وفالصبح حديث الام من جهة اخرى علا العروسة وما كاتعمل، حتا كايكمل برمسيون ويرجع للسربيس ديالو فالصحرا وهو عارف لاين راجع...

الحياة فدار منانة مع العروسة الجديدة والعروسة القديمة بدات كاتصعاب؟؟، كل وحدة باغية تفرض القوة ديالا فالدار..
مراة العربي هي الكبيرة وعندا البنت.. وباغية هي دي تكون مولات والري والشوار؟؟، اما سعيدة مراة حسن، هي مراة العسكري وهو دي كايصرف عل الدار؟؟ وهي دي قارية، وهي دي خاصا تكون مولات الري والشوار، وهنا منانة حارت فيهم بجوج كيفاش تقاد الميزان وتعمل للما مناين يگوز باش تمشي الحياة؟؟

رشيد الطالب بالجامعة عندو هدا العام الاخر وراه كايوججد البحث ديالو باه يكمل قرايتو ويقبط لاليصونص، ومن بعد يقللب علا راسو فالخدمة.

العربي باقي مع البيع والشرا فالزيت، وماشية الامور ديالو عادية، كايجمع الفلوس، وماكايصرف حتا حاجة،؟؟ بحيت حسن هو دي كايصرف عل الدار؟؟
- امراة خالي؟؟، فايرراها سعيدة؟؟؟
- راها فبيتا ا حفيظة، راها قالتلي راسا كايحرقا وعندا الشقيقة، ايوا راها شربت واحد شوية دي لويزة وقلتلا سير تككا شوية،
- ايوا لاواه ا مراة خالي، كولينا مراط؟؟ وكانرططع البنت وهاكداك وكانعجن ونشطب ونصببن؟ ونطييب؟؟؟
- حفيظة.. مابقيتشاي كاتحشم؟؟، ديالاش القلب ديالك؟؟؟،نسيت غير كانت كرشك لفاك؟ وحنا دي كانشقاو عليك؟، ونسيت غير ولدت؟ وهي كاتطيب وتجيبلك لبيتك؟ حييد من قدامي سير طييب غير لراجلك وبنتك وخلينا حنا بالجوع، ؟؟ الگنس الناقص..
- انتين ا مراة خالي كاتجي من جيهتا ؟؟ وكاتعمل الفرزيات فولادك، وديما العربي كاتطييح منو هو و اولادو؟؟ وحسن و مراتو عاطيتم القيمة؟؟
- ايوا، والله مابقيت كاتحشم،؟؟ لوكان عندك العقل؟؟ داك حسن دي كالسة كاتهضر فيه،؟؟ هازك انتينا و ولادك؟؟ ومامخليكوم مخصوصين حتا من شي حاجة، راكوم عايشين فيه، وايني راك كاتقللب عل الزلط؟؟؟
بقات المشاكل مابين حفيظة وسعيدة ومنانة مسكينة فالوسط كاتطفي وتبررد القلوب، وكاتغللب غير علا سعيدة دي درويشة، كيف ماكاتقول منانة، مشات حياة وجات حياة؟؟، سعيدة بحالا بحال حياة، درويشة، وايني الزهر قليل،؟؟؟
حتا لواحد النهار منانة اعرفت بلي سعيدة كاتولد؟؟؟.

يتبع...

مسلسل "حياة" - الحلقة 55

بني يازغة الخميس, نوفمبر 16, 2017
مسلسل "حياة" - الحلقة 55

الحلقة الخامسة و الخمسون (55) من مسلسل حياة

- ا حياة؟؟  اعمل ابنتي شي طبسيل دالقرايس ويالله نمشيو نرگبو علا يماك ومراة خاك؟؟؟، يقولو لك من السابع ما عاودو ارجعو؟؟ 
- والله يا خالتي محجوبة ايلا راني توحشت يما وماقدرتشاي نقولالك؟؟؟ 
- لياه ابنتي يانا كانمنعك من يماك؟؟، غير توحشا قولالي، راك بحال بنتي، ومصطفى ديما كايوصيني عليك،؟؟ 
- راني عارفة يا خالتي محجوبة، الله يكثر خيرك
منانة مسكينة حايرة غير مع حفيظة،؟؟، ماكاتعرفش تسممط ديك البنيتة؟؟ 
- ا حفيظة؟؟؟، هذا هو يا سماط؟؟، غير كاتكممسا وتنززلا؟؟، وياك ورريتك كيفاه تعمل؟ 
- ايما داك النهار راها تقلبت عليها فالنعاس ومشات تقتلا؟؟، حتا كانسمع البنت تحت مننا كاتبقبق؟؟؟، عاد كوورتا عليها، وهي كاتشخر
- سير ا العربي اخرج لقرانك؟؟، هذا شغل العيالات، ماضاعلكشاي فيه؟؟ 
وصلت محجوبة وحياة
- ايوا عالسلامة دي محجوبة
- قوم ا حفيظة اعمل الغلاي يطيب؟؟ 
- ايوا لاه مكلفين راسكوم يا محجوبة عاد قايمة كاتعجن القرايس؟؟؟ 
- لاواه يا منانة، هادوك اعملتم حياة؟؟ 
- ايوا شوفلك العفريتة، عندي يانا عممرا ما عملتم
- ايما راها علمتني خالتي محجوبة كولشي، ههه
-ايوا انتين راك كاتسمع وراسك خفيف؟؟، ماشي بحال هاد الطنبور؟؟؟، كانعلما كيفاه تسممط البنت، وهي غير كاتكممسا، وتزييرلا علا كتافا
- ايوا غير بالشوية يا منانة، البنات دي دبا راه ماشي بحالنا، ايوا ماكاين خبار علا حسن؟؟ شفتو تعطل،؟؟ هادي ثلث شهور باه مشا مصطفى، 
- والو يا لحبيبة، داك النهار صافط البرا، وكايقول لخاه،غير ووجدو للعرس راني قريب نجي، ايوا مازال ما ااظهر؟؟؟
رشيد مازال فالجامعة والمشاكل ديالا، مرة الاضراب، مرة المدابزة بيناتم مرة مع البوليس والسيمي، المهم العام گاز اكحل، شي قبطوه فالحبس، شي فللقوه من راسو، وشي مات وماعرفو شكون قتلو،؟؟؟ الحاصول رشيد و ولاد الدوار داك العام كولشي مروون، وقليل دي نجح.
العربي مازال كايبيع ويشري فالزيت فالاسواق، بدا كايسافر لفاس ويشري الزيت من المعصرة ويبيع وارجع معروف فالاسواق، العربي الزيات؟
اما حسن جا برمسيون، واعمل العرس ديالو بحال دي صاحبو مصطفى، واعرط عل العائلة وعل الدوار، ومشا حتا للرباط واعرط علا خالو واولادو، وگاز العرس النيميرواحد،؟؟، وراحت سعيدة بنت القرطاشية للدار دي منانة، وكيف ما العادة، اكمل برمسيون وارجع حسن للسربيس وخلا سعيدة مراتو مع يماه منانة وخاه ومراتو، اما رشيد راه بالجامعة كايجي غير مرة مرة
يتبع
مسلسل "حياة" - الحلقة 54

مسلسل "حياة" - الحلقة 54

بني يازغة الخميس, نوفمبر 16, 2017
الحلقة الرابعة و الخمسون (54) من مسلسل حياة

فات العرس دي حياة، واصبحت فدار اخرى، مافيها لا منانة ولا العربي ولا رشيد ولا حسن؟
دبا راها فالدار ديالا مع راجلا مصطفى وعگوزتا محجوبة والشيخ عمي المختار واللوس حميد، اما اللوسة عيشة هاديك مجووجة فبني سادن غير سالا العرس وگووزت السبعيام ارجعت لدارا
حياة، الدار ماعامراش بزاف، والشغال ماكاينشاي، وحتا مناين يجي الصداع ماكاينشاي، دي طيبتو كاياكلوه مجموعين، هي حاسبا محجوبة بحال يماها، وعمي المختار فموطع باها، وحميد بحال خاها، و حتا هوما حاسبينا بحال بنتم، ماكايخسرولاش خاطرا، 
مصطفى، اكملو داك الشهر دالتسريح، اعمل فيه العرس، وتساراو هو و حياة فصفرو وفاس وموززار، وبدا كايجمع حوايجو يرجع للخدمة
حياة اجمعلي حوايجي، فالصاك، راه غدا ان شاء الله نقبط الطريق، 
صافي ؟؟؟ لياه اكمل هاد برمسبون؟؟ 
ايوا الله يجعل البركة نمشي باه نخلي حسن يجي، هههههه، 
لياه ايلا مامشيتش انتين هو مايجيش؟؟؟؟ 
غبر كانضحك معاك، راه السربيس هاداك حنا دي كانعرفوه، مافيها لا يجي والا يمشي، 
ايوا سير گوز ليما، تعطيك شي زويتة وشي زويتنات تعببيهم لحسن، اما حتا الكاطو دبا نعطيهلك انا، راه باقي من العرس
كايمشي مصطفى للدار دي منانة، وماجبراش؟؟ 
كايجبر غير العربي ومراتو كايتخانقو، قابطا من شعرا وكالس كايجرجر فيها، 
اش كاتعمل ا العربي؟؟؟ 
هاد النهار نقتلا؟؟؟ 
لياه ا العربي اش اعملت لك؟؟ 
عاد كايفككالو مصطفى من يدو، وادخلت لبيتا كاتهرب، وبقا كايعاودلو
داك النهار اخاي مصطفى، فالسبعيام دي حياة، احبيبي شرا عندي شي زيت، ايوا عزلتالو فاعريش؟؟، باه غير يجي يهززا ويمشي؟؟ 
كاتجي هي وكاترددا للبيت؟؟؟ 
ايوا مافيها باس،؟؟  راها زيت زيت؟؟؟ 
ا لاااا اخاي مصطفى، يانا ماكنتشاي هنا، وعطاتو بنت الدليل من هاديك دالفيتور، حررة كاتقتل؟؟؟، ماشي يقولك احبيبي غير قولبتو؟؟
ايوا شي باس ماكان، فايرراها خالتي منانة،؟، راني غدا ماشي بحالي، باه توجدلي السخرة دي حسن نعبيهالو
راها اخرجت كاتوورق للبقرة،؟كاتجمع الورق دالشجر دي طايحين
يا الله تخرج من هنا، ماشي تبقا مع مراتك تمشي تفووت فيها شي دقة وهي حاملة؟؟ 
هادو يا خاي مصطفى راهم يخرجولك العقل، حمدو الله دي راكوم بعاد فالخلا؟؟؟ 
وارجع مصطفى للسربيس كيف العادة، واجبر صاحبو وانسيبو حسن كايعاينو، يعرف الاخبار، ويذوق من العرس وياكل شي حاجة من السخرة دي صافطتلو يماه
اما حفيظة من بعد شهرين، زييرا الوجع فالدار، وسخر الله كانت حداها منانة؟؟؟ 
سير ا العربي بالهروب، عييط لعمتك زهرة وبنتا هنية، قوللم راها حفيظة جاها لوجع؟؟؟؟ 
وتجمعو العيالات منانة وزهرة ومحجوبة عندم تجربة كبيرة فالولدة، و ولدت حفيظة بنيتة وسماوها فاطم الزهرا، والعربي وخا كان باغي الولد، وايني غير شاف كولشي فرحان، حتا هو افرح، واذبح ابرروگ نهار دي ولدت، وعملو العيالات الزمميت، ونهار السابع اذبح حولي علا مززيناتو
يتبع...
مسلسل "حياة" - الحلقة 53

مسلسل "حياة" - الحلقة 53

بني يازغة الخميس, نوفمبر 16, 2017
الحلقة الثالثة والخمسون (53) من مسلسل حياة

وهاكداك گاز العرس دي حياة كولشي فرح وكولشي شطح، وكلو وشربو ودعاولا بالتسخير، وايني ضروري من المحاسد؟؟؟ 
هنية؟؟  اختا دي حفيظة، قالتلم للبنات فالعين، انا ماعجبنيشاي داكشي؟؟، الطعام شاحت؟؟، تقول علا قلة المرقة؟؟، وديك غرييبة قاصحة تفللق بها الحمار؟؟، هههه نسات بلي اختا حفيظة دي گابلتا فالفران، هههههههه
اسي ادريس كايدور فالسوق، بانتلو اللفت المحفور غزالة كاتشهي؟؟ 
ايوا قولي ا الشريف، هاد اللفيتة وياك كاتطيب؟؟، مناين هي،؟؟  قصوابية؟؟ 
اييه ا سيدي، علا حسابي، وراها مجربة فالدار، ايلا ماطابت جيبالي؟؟؟ 
ا سي ادريس غير عرفا دالقصبة شراها وجابا لمنانة، قاللا اختي، فورلي هاد اللفيتة راني توحشتا مع زيت العود،؟؟؟ 
منانة فوورتا، وعملتلو النص مع لحم الراس دي بقا من العرس، والنص لاخور عملتو مع الزيت الجديدة، ايوا كلو هو وبهية، حتا شبعو
ا خاي بقاو معانا راه غدا ماشيين لحياة، السبعيام ؟؟؟ هاد النهار كايحزمولا؟؟؟ 
ايبه اختي فكرتني فالايام، الحزام؟؟، هههه،
اختي راحنا مانبقاوش غير نتغذاو ونقبطو الطريق؟؟؟، راها كملت ديك العشريام؟؟ 
ايوا سيرو قدامنا، يانا ماشي نشوف العربي يعبرلي شي بوطات دالزيت نخلصو فيهم ونعزلم علا يدي باه نعببيهم معايا،
العربي باقيلكشي زيت؟؟، عنناك تعطيني دالفيتور؟؟؟، راني خالك زعم؟؟؟ 
لاواه احبيبي، الزيت دالفيتور راني عازلا بوحدا،؟؟ حفيظة كاتبيع بلا خباري، وانا بالعاني نززلتالا فالباب دالبيت، غير كاتدخل مزروبة كاتهززا وتخرج هاربة ؟؟؟، ههههه
وايني راك شيطان يا العربي، هههههه
شحال بغيت نعبرلك احبيبي؟؟ 
عزللي ثلاثة دالبوطات دي ثلاتين يطرو
ها هي نخرجالك من البيت ونخليها هنا فاعريش،
شحال احسبت عليا ا العربي؟؟ 
اخلاه احبيبي، خيرك سابق؟؟؟ 
لاواه ا العربي، انا راني عووال نكييلا، وايني ملي جبرتا عندك فيك اولا؟؟؟ 
ايوا راك عارف التمن احبيبي دي بغيت تعطيه تعطيه، وايني راني نحيدلك عل الناس ميادالريال فليطرو
الله يسخر ا العربي، هاك الفليسات حسبم واعملم فجيبك، ويا الله نلحقو عل العيالات، لعند حياة، ماشي يبقاو كايعابنو؟؟؟ 
محجوبة وبنتا دي فبني سادن راهم كايوجدو الغذا ،ومنانة وحفيظة كايعاونوهم، اما حياة هاد النهار عندا الحزام مازالة ما عملت يداها فالما ؟؟حتا يحزمولا 
ايوا شوفو شي عزري دي باقي بلا جواج يحزملا
اجي ا رشيد تحززم لاختك؟؟؟ 
لا شوفو حميد خاه دي مصطفى، هو دي باغي يتجووج، يانا مازال الحال عليا، ههههه
جا حميد، وقبط الحزام وحززم لمراة خاه حياة، 
وهي سلمت عليه، وعطاتو الزرورة، الف ريال
ايوا كولشي فرح، وتغذاو مجموعين غير العائلة دالعروس والعائلة دالعروسة، وبهية تهللات فحياة وعطاتا واحد السنسلة كادو، وسلمو عليها هي واسي ادريس وقبطو الطريق للرباط
يتبع...