القائمة الرئيسية

الصفحات

قصيدة حووس أراجلي فالدنيا - الشيخ محمد تافراوت


دائما في اطار الاهتمام بالموروث الثقافي والتراث الاصيل، نقدم لعشاق فن الحيدوس والقصيدة الزجلية، قصيدة بعنوان:
   (حووس اراجلي فالدنيا) للشيخ محمد تافرارت من الدار الحمرا

احووس اراجلي فالدنيا وضرب دورة
ا لا تخمم لا فالعقبة ولا حدورة
خدمو لعولاما بكري رقعو الجرة
صنعونا لحديد ومافيهش الضرورة
ا ماتوسخ صباطك ماتشوف محنة

احووس اراجلي فالمغرب وتسارا
ويلا قنطتي اخرج لبرا ضرب دورا
عطاك ربي لجبال وجوج دالبحورا
وعطاك الطبيعة لعيون والخضورة
هادي بلاد الكرم وطرف من الجنة

احووس اراجلي وسارا فكل مكان
لبلاد دي عجباتك قصدا عليك لامان
ويلا بغيت الطبيعة سير لافران
لعيون والسواقي كاتجري بررد ا العطشان
والطل والجرادي والورد علا كل لوان
دي جا يزورا ماكايسخاشي يخرج منا

احووس اراجلي فالدنيا وعيش جوال
ويلا بغيتي تبحر طلع للشمال
ا خود مايكفيك للكونجي من مال
فطنجة والناضور وتطوان لغزال
فيه تجبر داكشي دي قالك البال
ا مايغلبك لا بالمصروف لا بسكنا

احووس اراجلي فالدنيا وسير للجنوب
دي لقيطون وخيام لاتكونشي مزروب
اكتشف بلادك زور الداخلة مع العرگوب
و جول فالمناطق لي ترابها محبوب
علاش كدا من واحد كرهنا وحسدنا

احووس اراجلي فالدنيا وسير لاكادير
اكتشف العاصمة دالجنوب د التصدير
دي كاتنتج الخضر وانواع الديسير
الله يحفظك ايا مغربنا بلاد الخير
ويدوم علينا هاد النعمة دالهنا

احووس اراجلي فالدنيا وسير للبهجة
لسبعة رجال سللم تنجا
ويلا مشيت لجامع الفنا تقبطك الفراجة
ادور عل الحلاقي تلقا شحال من لهجة
مخللط بنادم تما كولها مناين جا
الليل والنهار سهرة ماتشبعش منا

احووس اراجلي فالدنيا وعيش جوال
لبلاد دي ماعرفتاش سوول وسال
مايهمك فلوس ومايهمك المال
امايخصك خير ايلا ضايفوك لجبال
ويلا قبطتي الطريق ادخل علا بني ملال
ادوز ترتاح فداك العين وشرب منا

احووس اراجلي فالمغرب وتسارا
اخود الفلوس بالزايد وعمر الشكارا
اسير للدار البيضا كمل الزيارة
هاديك كرش الغولة مافيها شطارة
ا كايعرفو فبلادم غير هاك وارا
ا كولشي كايتشكا بالغلا قهرنا

احووس اراجلي فالدنيا ودير شي جولة
اجيبها فالعاصمة فالرباط ياو سلا
تما الگلسة تعجبك حدا الامواج كاتحلا
اشوف المآثر كل واحد اشخللا
اشوف هاد الصمعة وشكون دي بنا وعللا
بقات غير سمية حسان كاتفكرنا

احووس اراجلي فالدنيا دوز للخميسات
هاديك ارض الكرم وكانعرف فاين جات
ايلا قصدهوم الضيف وجا لعندهوم يبات
الناس دازمور وزايان نيتم كفات
ايلا غدرنا فيهم طعامهوم يقبطنا

احووس اراجلي فالدنيا و هوود لمكناس
ادوز للهادي بنعيسى زور لا تنقاس
اسلم من العمر تنجا وماتشوف عكاس
اجيه وقت الموسم بعدا تشوف دوك التاس
د الجدبة فالحضرة والدم حايف من الراس
شي كايشرب الما طايب كايفوور من الطاس
ويعييط الشيخ الكامل يضمن الضمنا

احووس اراجلي وشوف شلاقيا الدنيا
اجيب دورة فالعاصمة العلمية
ازور مولاي ادريس ايلا دخلت بالنية
وقرا التاريخ دي فاطمة الفهرية
فجامع القرويين باقية السمية
وشحال من عولما تخررجت منا
                            محمد تافراوت