القائمة الرئيسية

الصفحات

مسلسل "حياة" - الحلقة 5

هاد النهار فاقت منانة مع الفجر كيف مولفة، وجبرت الشتا خيط من السما، مشات للكانون شعلت العافية، وعملت الغلاي لكحل يسخن،فاق موراها بوعزة،مشا كايهرب يشوف البيت دالتبن،والمربط،ايلا يكونو كايقطرو اما الكسيبة راه عامللا الزريبة قدام الدار، وفاتحلا واحد الخرراجة لاعريش، كاتضرق فيه وقت الشتا، هادشي كلو والدراري باقيين ناعسين.
 
فاق حسن هو الاول..

- صباح الخير ايما
- صباح الخير، اوليدي
- اوليدي ماتمشيشاي دبا حتا يفتر الحال، الشتا خيط من السما،
- اخلاه ايما قالا مانمشيش، شوفلي غير شي ميكا نغطي بها الكتوبة والدفاتر باش مايترواوليش، وجبدلي الجلابة ديالي، فايرراه داك البوط؟؟؟
- بلاتي اوليدي، بعدا نحلب البقرة، تخووط ديك القهوة ديما كاتفطر بها كحلة، كاتمشي بكري،
- اغير جبدلي الجلابة ماشي يمشي عليا الحال، راه الدراري ماشيين
- ايوا سير اوليدي الله يرضي عليك، ورد بالك مع الغيس


حلبت منانة البقرة، وطيبت الفطور، ومشات تفييق حياة،

- يا الله ابنتي قوم ماشي يمشي عليك الحال، خاك راه قام وامشا للمنزل.

قامت حياة، وشافت الشتا..

- صباح الخير ايما، فايرراه اببا؟؟؟
- راه فالسطح ابنتي، كايدق القطرة، ماشي يضيعلو التبن
- ايما نمشي للمدرسة فهاد الشتا؟؟؟
- اجي نمشطلك شعرك بعدا وتفطر، ويهبط ابباك من السطح، باه يعببيك
- اياجي ا بوعزة بعدا تفطر؟؟؟؟
- صباح الخير اببا
- صباح الخير ابنتي، ايوا غطيلا حوايجا ا منانة،من البرد، وجبدلا داك البوط الحميمر دي شريتلا،واعمللا شي دررة علا راسا ماشي يتروالا راسا،
- ا منانة، منانة!!!
- فييق داك الخطية، دالعربي، مافيا مايتغاوت معاه عل الصبح، انا ماشي نوصل البنت للشكويلة ونرجع، ها الكسيبة من الصبح وهوما يبعبعو
- ا واخا غير سير ا بوعزة، دبا نفييقو