القائمة الرئيسية

الصفحات

مستملحات عمي التهامي ومراتو رقية - الحلقة 5

مستملحات عمي التهامي ومراتو رقية - الحلقة 5

هاد النهار عمي التهامي ماشي يسرقوه فالسوق.
- أ رقية غدا نشاعالله، ماشي نقوم بكري، غير نصلي الفجر ونقبط الطريق للسوق، نعببي واحد المداين دالشعير وشي مد دالفول نبيعم، - ايوا غير نغزك ماتبقاشي كاتشحوط
- ايو عببي كرسانة وخلينا الفويلات كانطيبوهم منگوب، وكانبرريهم بيصار، البرد هادا، 
- خلي كرسانة للبقرة راها گايزت هاد العام، ليه انتين معكسة!!!
ايوا مشا عمي التهامي للسوق، باع الشعير والفول، قبط الفليسات وعملم فالجيب دالسروال، گازو الشفارة، شررگولو الجيب وعبباو الفليسات، مشا كايجبد يخللص مول البصل، كايجبر غير الريح.
ايحا عليك التهامي عبباولك الزگيمطات دي كاتعلام، وباش ماشي تسووق
- السلام عليكم، الحاج اشخبارك، ايوا كيف عامل السوق
- وعليكم السلام، التهامي، شفتك قبايلة گايز ناتر، وياك لاباس، 
- اودي يا الحاج راهم كشطوني، وعباولي دوك الريالات وخلاوني زاوي
- الله يخلليلك صحيحتك ويطوول لك بوحبل، ايلا ما سلفلي واحد الالف ريال نتسوق بيه، حتا للسوق الماجي
- هاك التهامي، ورد بالك شويش، الدنيا مخلطة، ماتبقاشي غير حال فاك
ايوا التهامي، تسوق وارجع لدارو
- رقية وا رقية، اياجي قبط هاد اقراب، وعبي هاد الحمار ربطو فموطعو وعطيه التبن، وحيدلو الحلاسة، راني مناكي
- ا مالك التهامي مغوبش، اش طاريلك
- حييد من قدامي، وجيبلي مانحنجر، راه قاتلني بوهيوف
- ايوا تغذا التهامي، وعممر كرشو، 
- ادوي التهامي من دي دخلت وانتين مغوبش، قولي ياك ما السوق عيان
- يا رقية غير اسكت، شرگولي الجيب وعبباولي دوك الفليسات دالشعير والفول، ومافطنتش بيهم، حتا مشيت كانخلص مول البصل وباطاطا، كانعملا ملتحت فاقراب، قاصحة،كانجبر الجيب مشررگ والفليسات عبباوهم
- ايحا عليك ا التهامي، هادي هي دي كاتقولي يانا راجل ونص
- ا قوم من قدامي ا بنت المحقور!!! يانا راجل عليك ،ليه عل الشفارة؟؟
ماجي ولدو مصطفى كايقرا فالكوليج
- اببا، شريتلي السبرديلة
- صافي، انتين دي بقيت ناقصني يا مكررع الفا!!، علا ديك القراية دي كاتقرا؟؟ 
- رقية، فايرراها لطيفة؟؟ 
- راها مع بنت الكاملة كاتخدم العقد
- هاك عطيها هاد السروال، تخيطلو هاد الشرگة، ما نتين مابقيتشاي كاتشوف بدوك العيناين المعمشين
- أ غطي لحمك ا التهامي!!!!  مابقيتشاي كاتحشم
- انتوما خليتو دي يحشم، راني بالجلابة

عمر الكرمي
بني يازغة، بنيازغة،  benyazgha, beni yazgha