السلام عليكم ورحمة الله وبركاته اخواني اخواتي الكرام، اقدم لكم هاته القصيدة على طريقة الصينية والكيسان، اتمنى ان تروق اعجابكم اهديها لجميع الاصدقاء والاهل والاحباب، ولبني يازغة قاطبة، من عين سبو حتى لقاع السد.
الحمامة - عمر الكرمي
وا طير يا الحمامة ونتين راك حرة
واطير يا الحمامة واحضي من النسورا
وراه لحمك هشيش وما فيه هبرة
ينهشوه لوحوش لحمة وشحما
وا طير يا الحمامة بجناحك فسماك
ومايحبسوك زروبا ولا الشباك
وراه العقاب منقيرو ماضي وفتاك
يقرط جناحك وتهبط سخفانة وكوما
وا طير يا الحمامة وغير ما تعلليش
وراه بلا بيك انا مانقدرش نعيش
وراك كاتحمقني بالزواق فالريش
الولف ديالك طبع فقلبي البصما
وا طير يا الحمامة وما تعلليش بزاف
وراه البال مهول والقلب عليك وللاف
غير كانتخايل تغريدك فوق الارفاف
غير كانتخايل نزولك عل الاكتاف
أ كانحس براسي فرحان ديما
وا طير يا الحمامة ونتين دي تطيري
وراه خايفك تنزل فسطوح غيري
يسوط، فيك العدو وخا يكون جاري
وما تجبرشي التهلية بحال داري
غير الخبز يابس منشور بلا ما
وا طير يا الحمامة والعش كايعاين
وما تخليش الفراخ صغار فالمحاين
وراهم كايقطعولي قلبي مساكن
الحنش الغضضار غير يفافي فالغراين
يطيح فيهم العدو قلبو حجرة وصمما
وغير فقت يا الحمامة وما جبرتكش
وراه القلب تشطن عليك وتشوش
أ كانتخايل خرج فيك الصياد والوحش
أ كانتخايل تلاقاك النسر بو كرش
قلوبم حديد وما فيه رحما
وا طير يا الحمامة عللي وزيد عللي
وما توقف حتا تشوف الزيتون والدوالي
هاديك بلاد جدي وعمومي وخوالي
هاديك بلاد حبابي وصحابي واهلي
راهم معروفين بالسخاوة وكرما
وا طير يا الحمامة وما توقف حتا المنزل
ودور عل الاربوع والقلوع عاد تنزل
ورهم القلب كبير يعطيوك تاكل
وعنداك تستحلا الهوا وتگلس تمما
تعليقات
إرسال تعليق