مستملحات عمي التهامي ومراتو رقية - الحلقة 11

بني يازغة الجمعة, يوليو 28, 2017
مستملحات عمي التهامي ومراتو رقية - الحلقة 11

كلها كايحسب حسابو
عمي التهامي كان علا برا كايحووط لشي زيتون وادخل للدار، وهي خارجة بنتو لطيفة كاتغوت
وابا واحد الحنش!!!، وابا واحد الحنش!!!
اجري اجري ا التهامي قتلو ايلا يعط البنت!!!!!
فاين هو هاد الحنش؟؟؟
ها هو ابا!! ،ها هو مور الباب!!!
اووووه!!، وشكون دي يقربلو؟؟، انا كانشوف فيه وهو كايوقف علا ذنبتو
ايحا عليك التهامي؟؟؟ ايوا انتين دي راجل هنا فالدار؟؟
ليه الحنش كاتنفع معاه الرجلة؟؟
اجري اجري ا لطيفة شوف شي واحد ايلا كان گايز من حدا الدار، قولالو، هاد الخطية دي باباك خواف
خرجت لطيفة ما كاتجبر غير فريطو
اشداكشي ا لطيفة؟؟؟ سمعتك كاتغوت
واحد الحنش دخل لعندي للبيت، اجري اجري ا عبدالعالي قتلو، راه با خاف منو
ايوا عنناك يقولي باك، لاه داخلي لداري؟
ايوا غير ادخل ماتخافشاي
ادخل عبدالعالي للدار
فايرراه هاد الحنش اخالتي رقية؟؟؟
ادخل اوليدي راه فالبيت دي لطيفة مشا يقتلا بالخلعة، عمك التهامي قلبو هشيش ماكايقدرشاي يقتلم
اه هذا!!!، ههههه، اخلاه اعمي التهامي هذا غير بو مرايات ماكايعطشاي، مافيهشاي السم، هههه
اوياك افريطو كاترجل عليا فداري
لاواه اعمي التهامي، مابيناتناشاي، راحنا جيران،
رقية ولطيفة عجبم الحال
ايوا گلس اوليدي يا عبدالعالي تشرب كوييس داتاي، والله ايلا كون مانتين، ايلا لطيفة مشات تموت بالخلعة
اگس اعبدالعالي، راك راجل ونص راني غير كانطحك معاك
اعملنا ا لطيفة شي براد داتاي، عبدالعالي راه واحد مننا
اوليدي منين ماگاجيتشاي دبا نقلو لابني الحسين، يقططعك لفرنسا
ايوا ايلا عملتا يا عمي التهامي، ماعمرني نسالك هاد الخير،
ا رقية، دوك الفول دي عندنا فتاغدة راهم يبسو، نشوفو داك ولد المختار يحتشم ونخلصوه؟؟؟
ايوا قولالو ايلا كان ماخدامش
كاينقز عبدالعالي
وليه اعمي التهامي يانا اش كانعمل؟؟
يانا نحتشم ،ماتعطينيشاي، راني واحد منكوم
اشرب اوليدي ياتاي وقوم تخرج، ليه غير دي خررجت داك زرغميل من الدار، ارجعت واحد مننا؟؟؟
لاواه التهامي، الولد راه، ديالنا!!
ناض عبدالعالي خارج، وهو يشوف فلطيفة، تبعتو للباب
ا لطيفة نقولك واحد الحاجة وماتقلقش مني؟؟
غير قول العيفة، راك بيينت تارجليت ديالك قدام عمك التهامي، هههه
هاداك الحنش يانا دي عملتو فالسرجم ديالك باش يدخل لعنك، ههههه
ايحا!! علا ولد الحرام باغي تقتلني وتهننا مني!!!!!
ا لا يا الهبيلة، هاداك راه كاياكل غير البيض دالزاوش، مافيهشاي السم،
عمي التهامي حس بلطيفة تعطلت فالباب
اشكون ا لطيفة،؟؟؟، ادخل بحالاك؟؟؟
هذا غير عبدالعالي ابا!!، قالك واش يمشي غدا يحتش الفول؟؟؟
ايوا قلو يمشيلم غدا فالصباح، الله يرضي عليه
ايحا عليك دغيا لصصقتلي الحتيش دالفول؟؟؟
باش تعلم اولد الحرام،
وايني انتين دي تجيبلي الغدا
والله يا فريطو لا دقتو؟؟، والله ياباك حتا تقييل كاتحتش بالهومري، هههه
وايني قلبا ارطب، عبباتلو الغدا مع العصر، جبرتو عيناه ترخاو بالجوع، هههه، غير شافا ماجية وهو يوقف وخررج عيناه، يا الله نزلتلو الغدا، وهو عمي التهامي كايخلط عليهم،
يا ليه مازال ماساليت ا عبدالعالي؟
ولياه ا لطيفة تعطلت عليه بالغذا؟
ا با العجين ماخمرليشاي، ديك الخميرة الرومية طايلة وعملتلي الشوهة هاد النهار، (الجواب موجووود)

عمر الكرمي

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »