قصيدة "يا المدينية يا خيتي" - عمر الكرمي

بني يازغة الأحد, ديسمبر 25, 2016

قصيدة "يا المدينية يا خيتي" - عمر الكرمي

دائما في إطار الرد، التناعير، عمر الكرمي يرد على محمد ارطيلي بقصيدة يا المدينية يا خيتي.
ارطيلي الذي نعر الكرمي بقصيدة ياك أنا المدينية


يا المدينية يا خيتي
جي لعندي تشوف بيتي
فيه كل ماتشههيتي
كولشي عندي نباتي
والكحول علا يدي مخدوم
***
يا المدينية يا خيتي
ايلا كنت انا مقهورة
راه جدك بو خنفورة
ماقراش بحق الجورة
وكلاننا فلوس المنجورة
وكركر من الرملة عرروم
***
يا المدينية يا خيتي
واخا تشوفونا بالكثرة
كل دار صح من عشرة
ها دي فالبيع والشرا
وها دي مغررب فالصحرا
وها دي اخرج لبررا
وها دي خدام فالعموم
***
يا المدينية يا خيتي
دي تزاد تزاد برزقو
ما صعيبة علا دي خلقو
راه شي بعطين دي سرقو
خدعوه وكلاولو حقو
وبقا فهاد الدنيا محروم
***
يا المدينية يا خيتي
كانصيفطولكوم الطبيعي
وترددوهننا صناعي
اهلك لي عظام طلوعي
وبعت عليه كل متاعي
ماعرفتو روماتيز ولا زللوم
***
يا المدينية يا خيتي
الشينوا تصنع وتصيفط
وانتينا غير كاتسرط
ويماك غير كاتمحط
شوف خاك كيف مسههط
شوف باك فاين مسيطط
كرشكوم عامرة سموم
***
يا المدينية يا خيتي
ماتفيق حتا العشرة
والماكلة ديما بررا
بايتة وعامرة غبرة
وتابعة كلام النشرة
كولشي مور الشاشة مخدوم
***
يا المدينية يا خيتي
غير ركبي واجي لينا
واخرج من جو المدينة
راه الدنيا عندنا زينة
نزوقوك كولك بالحنة
ونعببيوك لخاي احسينة
أو خطبوني لخاك الجحموم
***
يا المدينية يا خيتي
راني ظرييفة وعزيزة
واخا سميمرة كيف المعيزة
نجي غزالة فالتبريزة
وفالتكشيطة كي الفريزة
ونفقص وناكي واحد المجحوم
***
يا المدينية يا خيتي
راني غير طححوكية
اهلي ماسخاوشي بيا
والخطاب كثار عليا
وايني من صغري معطية
لولد خالتي حدوم

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »