مسلسل "حياة" - الحلقة 20

بني يازغة الأربعاء, أكتوبر 18, 2017

  مسلسل "حياة" - الحلقة 20

 الحلقة العشرون (20) من مسلسل حياة

- امراة احبيبي، واش هدا خاك؟؟؟
- اه، هدا هو خاي هشام، مالو؟؟؟
- كان هو واصحابو كايطحكو عليا
- وياك ا القبيح!!! ماشبيتشي فبن يازغة، الجود والكرم، وايني راك زيادة وخلوق فالرباط؟؟، مايورريوك طريق، ما يعطيوك راس الخيط!!!
- لا اختي، والله ما عرفتا، كاتقول امراة حبيبي، بهية وماطاحتش عليا بلي راك انتي؟؟، غير اسمحلي اختي.

حسن خرجو كايدورو هو وخالو فالجنانات، واسي ادريس كايشم ريحة البلاد ويتفكر ايام الصغر ديالو، وملي رجعو للدار اسي ادريس شم ريحة ابلبول والفول، ومشا قصاد للكانون...
- الله يعطيك الصحة يا اختي منانة، فكرتني فالوالدة الله يرحما، والله ايلا ريحتو كاتطرب من الطريق!!
- ايوايا خيي، قلت نعملك كصيعة، ونتجمعو عليها، لياه بهية ماكاتعملوش؟؟؟
- اخلاه يا اختي، قالا تعمل هي يابلبول؟؟، فاين ماشي تعرفلو؟؟؟
- وياك زعما هي خلاقت هنايا وكبرت هنايا؟؟، ويماها الحاجة كانت كاتعملو، او ماعندكومش الفول وابلبول؟؟؟
- ايو غدا نصيفط رشيد للرحى ونعطيه واحد نص مد دالفول يبرريه، و واحد المد دالشعير يبلبلو، ونصفيهلك وعبيه معاك، راها حياة عزيز عليها.
- اخييي الله يرحم يما وبابا، ايلا ما اهضر مع العربي انتين دي يسنحر منك، حسن صغير عليه وماكايبغيشاي معاه الصداع وهو قبيح ماكايحشم من حد، من دي مات باباه وهو ردا غير عل البيع دالكسيبة والخسران دالفلوس، دبا راه تابعني قالك نقسمو البلاد ويبيع حقو؟؟
- يا اختي اذكر الكلب، و وجد الزللاط!!!، ها هو ماجي بالكسيبة
- ماخللاشاي راها كانت كطعة تبارك الله هي ماكاينة فالدوار
- اجي العربي؟؟؟
- عالسلامة احبيبي
- زعما انتين الكبير فخوتك!!! انتين مول العقل، وانتين دي تخلف موطع بباك!!!، وتحرث وتفللح وتگابل البهايم والكسيبة، باباك الله يرحمو، ماعمرو باع شي شبر من بلادو، وانتين باغي تبيعا ؟؟؟
- احبيبي غير قلت نربط عجيييلين ونعلفم، دبا هاد الشياه ما فمولاهم غير تمارة،
- اسمع ا العربي،!!! حسن ها هو ماشي يگاجي، ورشيد ماشي يكمل قرايتو، وانتين گابل الفلاحة دي خللالكوم باباك، والصيف الماجي ايلا جبرتك راجل، ماشي نجووجوك!!!
- ايوا اش قلت؟؟

يتبع...

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »