مسلسل "حياة" - الحلقة 46

بني يازغة الثلاثاء, نوفمبر 14, 2017
مسلسل "حياة" - الحلقة 46

الحلقة السادسة والأربعون (46) من مسلسل حياة

العربي عملتو الجماعة جماج يحضي الزيتون، وبدا كايفيق بكري ويدور ودي جبرو طالق الكسيبة او كايسرق كايتغاوت معاه ويهددو،
-ا عبدالرزاق؟؟؟، الياه كاتگوز من هنا بالكسيبة ديالك؟ بقا تمشي من أزرگ؟؟؟
-ايوا لياه ا العربي؟؟ انتين ما عندك زيتون هنا؟
-لياه مافراسكشاي راني جماج ؟؟؟
-هاكداك !!!! لا مافراسيش، ايوا ايلا يحضيو، يحضيو غير منك ا العربي ومن الكسيبة ديالك؟
-ا باركة من الحشيان د الهضرة!!! دبا نقولا لباباك؟
وهاكداك گووز العربي داك الشهر كامل وهو كايحضي الزيتون د الجماعة، مرة يدابز مرة يتصالح مع السراح والواشون دي كايشووشو ، حتا طلقو وبدا كل واحد كاينفط ويجمع الزيتون ديالو، ايوا بصراحة عجبم الحال والناس كوللا تهلات فيه واعطاوه حقو دي تاجماجت واجمع خير الله د الزيتون، وعمي لحسن مول الرحى اعطاه الرحى يخدم فيها ربباع جاب اليغل ديالو كايجر الحجرة دالرحى، الناس كايطحنو ويعطيوه هو الزيتون، والبغل مطرب دالزيت، ايوا گاز العام مزيان عند العربي.

اما حسن وصلو برمسيون وجا للبلاد وتلاقا مع الزيتون، وگاز لخاه رشيد لفاس وجاو مجموعين، حتا دخلو علا يماهم منانة؟؟
- ا عاسلامة دي حسن، اشخبارك ابني، والله يابني ايلا فايدة هادي دي جيت فهاد الوقت،
- الله يسلمك ايما، ايوا اشخباركوم ،فايرراها حياة؟؟؟
- راها ابني عند سعيدة، دبا عندم العطلة، ايوا سعيدة مابقاتشاي كاتقرا، كالسة كاتخدم العقد، وهي مشات لعندا، قالتلك نوونس يداي، داك النهار وصصاتا تقبطلا شي جعيبات، ايوا والعربي راه فالرحى دي عمك لحسن، ماشي هاد العام راه جماج ورباع فالرحى، ايوا راه تحززم، ماعنك ماتساللو،
- ايوا مزيان داكشي دي بغينا، يخدم شوية ويجمع راسو، دبا راه مجووج
- قول يا ابني راه بلولاد؟؟؟، ماشي راها مراتو كاتولد، هدا الشهر الثالث عندا، وكاتقييل غير مغغطة، خليني ابني ساكتة، ماكاينشاي خلاه
لغدا مشا حسن عند محجوبة وعببالا السخرة دي مصطفى والبرية عطاها لحميد خاه
- ايما؟؟ راني بغيت نمشي للرباط، عندي تما شي وراق باغي نخدمم، وهي هاديك نگوز لاحبيبي، يقولك ماعمرنا سولنا فيه
- ايوا مافيها باس ابني، الله يرضي عليك،
كايتكلم العربي، قالو لحسن:
- ا حسن؟؟ اخاي هاد النهار ماشي نطحن واحد جوج خناشي دالزيتون نسهرو عليهم فالرحى، ونعملو شي معقودة دالبيض البلدي، و نعطيك شي بيدو الزيت عبيه لاحبيبي يدوق الزيت الجديدة، خيرو راه سابق،
- ايوا الله يرضي عليكم ابني ويتاوي خاوتكوم
- والله ايلا فكرة مزيانة هادي ا العربي، راني توحشت الريحة دالفيتور وشي طبسيل د البيصارة،او شي معقودة كبيرة بزيت العود، ههههههه، وايني حياة دي تطيبنا شي طنجرة دالبيصار، ههههه
- والله اخاي حتا نطييبا ونجيبالكوم للرحى، ههههه
يتبع...

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »