مسلسل "حياة" - الحلقة 25

بني يازغة الأربعاء, أكتوبر 18, 2017
مسلسل "حياة" - الحلقة 25

الحلقة الخامسة و العشرون (25) من مسلسل حياة

- هههه، مزيان اختي، بالصحة والراحة التبحيرة
- أ خاي شخبار يما مسكينة، كيف بقات؟؟؟، وشخبار خاي رشيد وخاي العربي؟؟
- كوووولشي بخير كايسلمو عليك كولم، وراها بقات بلاصتك يا العفريتة، ههههه
- ا خاي جبتلي الانتقال؟؟؟
- اخلاه الهبيلة، لياه فتحت المدرسة بعدا؟؟؟، حتا تفوت العطلة، وديك الساع يمشي احبيبي يجيبولك؟؟، او يصيفطولك رشيد؟؟
- ا خاي غير كاتطحكو عليا، جابوني لهنا خدامة!!!
- والله لا كانت، مزيان وتبارك الله، غير يوصل الدخول، ايلا ماجابوهش، نعببيك للبلاد، وانا اختي نخدم عليك حتا تتزوج،؟؟ لياه شحال عندي منك؟؟؟
حياة مسكينة عاد بردت شوية من دي جا خاها حسن، عزيز عليها بزاف وهي عزيزة عليه.

ايوا باتو عند اسي ادريس ولاغدا مشاو عل الصبح للقشلة، ومشا معاهم خالو، وادخلو عند الكماندار وهو وفا بالكلمة ديالو ودخلو بحوج حسن ومصطفى، واعزلوهم مع الدراري دي قاريين بوحدم وکوزو تما فالرباط شي شهر ومن تما هززوهم لمراكش تما يكملو السطاج.
وصل الدخول د المدرسة واسي ادريس مشا جاب الانتقال دي حياة، وتقييدت فمدرسة قريبة للدار والعلاقة ديالا مع مراة خالا مزيانة وبدات كاتقوللا ماما بهية، وبصراحة بهية ما مقصراش من جهتا ومهلية فيها بحال بنتا..
العربي ادخل فالبيع والشرا دالبهايم وديما فالاسواق وايني يدو متقوبة دي كايجمعو كايفرتكو فالاسواق..
رشيد ارجع كايقرا فالثانوية ومازال كايبات فالخيرية وماكايروح لدارم حتا للسبت.
منانة مسكينة مگابلة غير البقيرة ديالا وتفتل الحبال وتغزل الصوف، وديما خاطرا مشوش مع مع بنتا حياة وابنا حسن هوما دي غايبين، حتا لواحد النهار تلاقا الجاري العربي واعطاه واحد البرية قالو هادي دي حسن. وجابا العربي للدار واعطاها ليماه؟؟
- ايوا لوكان اقريت بحال خوتك ا القبيح، مانبقاوشي كانعاينو رشيد حتا للسبت عاد يجي يقراهانا ويقولنا كيف راه حسن؟؟؟
- اشماشي نعملو بالكواغط قللو يصيفط الفلوس؟
- ايوا حتا يجي وقولالو، ماياناشي هبيلة نتبعك فهبالك،بالك غير مع الفلوس؟؟؟، غير تدخل للدراز ايلا بان لك شي واحد كايقرا قللو يوصي رشيد باه يروح نهار السبت؟، وجبب معاك واحد الفتيلة د لانبا؟؟؟

يتبع...

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »