القائمة الرئيسية

الصفحات

مسلسل "حياة" - الحلقة 13

الحلقة الثالثة عشر (13) من مسلسل حياة

بهية غير شافت حياة بنيتة مازالة صغيرة ودريوشة دخلتلا لقلبا.
- قوللي اختي منانة هادي هي البنيتة الصغيرة ديالك؟؟
- اييه اللا بهية، هاديك هي الصغيرة فخوتا، وهي بوحدة دي بنيتة ماكانوشاي كايعيشولي، ايوا نقوم بعدا نعملكوم اتاي ونوجدلكوم ماتاكلو.

بهية قرربت لحدا راجلا ادريس، وقالتلو اهضر مع اختك منانة تخللينا البنيتة تكبر عندنا وتقرا عندنا، نتهللاو فيها.
- ايوا مانعرف واش تبغيشي ياولا؟؟، راها هي دي عندا
- ايوا غير قولالا بعدا، راها ماتخسرلكشاي الخاطر، راك خاها ماراكشي برراني!!
ادخل حسن سللم عليهم وبقا كايتجممع معاهم، وهو يقوللو لخالو:
- أ حبيبي، راني باغي نگاجي ايلا كاتعرف شي واحد تما فالرباط يوقف معايا، الله يرحم لك الوالدين ،دبا راك كاتعرف كولشي بالوجهيات ويانا هاد العام ضوبلت ماقبطتاش الباك، نمشي نخدم علا راسي، هانتين كاتشوف الوالدة يدا بوحدا وخوتي باقيين صغار والزمان صعيب.
كاتتكلم بهية، قالتلو كاين دي يدخلك، راجل اختي كماندار فليطامهجور، مانعاينشي نقولالو، ومايخسرليش خاطري.
- الله يرحملك الوالدين امراة حبيبي، ويجازيك بخير ويعطيك ماكاتتمنى،
- امييين، الله اودي يا حسن راك بحال خاي هشام، مابيناتناشاي.
سي ادريس بقا غير ساكت وافهم الامور، فيها هادي فهاديك، تعببي حياة ويدخل حسن للعسكر.
ايوا جابت منانة اتاي وبويضات بلديين مطفيين فالسمن، كلو حتا كلو وقامو خرجو لقدام الدار، وهو سي ادريس كايجرر اختو منانة، اهضر معاها واعطاها واحد البركة مستورة باه ماتشوفوشاي بهية، وقاللا اختي خلليلي حياة تمشي معايا تقرا عندي ونتهللا فيها بحال بنتي، هانتين كاتشوف ماعطاناشاي الله لولاد، وبهية ماشي يخرجلا العقل عل الواشون، هادي سبع سنين وحنا تابعين الطببا، ماخللينا حتا قنت، وحسن طربو علا حسابي، راه باغي يگاجي نوقف معاه حتا يغطي الكسوة.
يتبع....