مستملحات عمي التهامي ومراتو رقية - الحلقة 14

بني يازغة الخميس, أغسطس 03, 2017
مستملحات عمي التهامي ومراتو رقية - الحلقة 14

هاد النهار لطيفة ماشي يجيوها الخطاب
عمي التهامي كايدور فالسوق، ايوا تلاقاه واحد الراجل يازغي
عا السلامة دي عمي التهامي، اشخبارك، ايوا فاين هاد الغيبة ماكاتبانشاي
لاباس أ بناصر، الحمد الله، راحنا غير مع هاد الحبوبات دالزرع كانجمعوهم
قولي اعمي التهامي، كيف تعرف من دي ماتلي المرا ويانا كانگابل دوك الواشون، ودبا راني قلت نجيبلم شي بنت الناس دي تحسن بهم
ايوا مافيها باس، ايلا عملتا هاديك راها مزية
ايوا قلت يا عمي التهامي مانجبرشاي احسن منك، انتينا راجل مول الخير وبناتك الله يعمرا نقرة
ايوا يا بناصر انا بقاتلي غير وحدة كايظاهرلي صغيرة عليك، وايني نشور معاهم، والله يكمل بخير
ايوا راني ماشي نجي لعندكوم فالعشية
يكون خير أ بناصر
العشية ماجي بناصر، هو وباباه ويماه،
ا رقية، اعملو شي براد داتاي واجيو سلمو علا هاد الناس
جات رقية ولطيفة، ايوا سلمو عليهم ورحبو بيهم، وقامو رجعو للكوزينة
ايما واش يانا ماشي نعبي هاداك قد با؟
ايوا بنتي ويلا كان لك فالعرش؟، ماعرفت الخير فاين كاين؟
ا والله لا عببيتو!!!
غير بقا تابعالي داك فريطو، ها هو العام دي كايجي كايقولك مازال ماجمعت راسي تقول ماشي يعمل الفيشطة؟؟
التهامي راه كايهضر معاهم ويتجمع، ايوا جابولم التوعيف، كلو وشربو
تكلم باباه دالعريس، ايوا التهامي، حنا جينا قاصدينك والمقصود الله،ايوا اش كاتقول
ايوا يا الحاج، ماعندي مانقول، راني عطيتكوم ايلا عطاكوم الله، ماشي نشور مع خاها وخواتاتا، ونرد عليكوم الخبار
لطيفة قالتلا ليماها، بغيت نهضر مع هاد الراجل
سير ا مصطفى قلو لباباك يجي لهانا
اش داكشي ا رقية؟
هاد الراجل كبير عل البنت، ودبا بغات البنت تهضر معاه، سير جيبو لهاد البيت
ايوا دخلو لواحد البيت، لطيفة فقنت، وبناصر فقنت، كولشي حشمان
كايتكلم بناصر، اش سمماك الله؟
لطيفة
خيار، قولي ا لطيفة، باباك هاد العام حارتشي فول؟؟؟
لطيفة ساكتة غير كاتواكل بوحدا
هاد العام كانت الشتا، لوكان غير احرث بزاف، او ماعندوش دي ينگطلو؟
قولي ا لطيفة باباك عندو الجوجة ديالو ياو مفارد معا شي واحد؟
يانا عندي الجوجة ديالي ماكانحاشيه لحد
كاتنطق لطيفة، ايوا هادشي هذا سير سول عليه با؟، ماشي يانا؟؟
ايوا سالاو الجماعة، وارجع الراجل حدا باباه ويماه، قالتلو يماه اش قالت لك؟
قاللا ماعندا ماتقول راها حشمانة
ايوا خرجو، ومشاو بحالم
كاتخرج لطيفة، مشات كاتدق علا فريطو
اسمع ا عبدالعالي، والله ياباباك ولا جيت، تخطب هاد اليامات، يا حتا نعبي هاد الراجل، أ قبيح السيفة، مزيان وتبارك الله، كاتطحك عليا بالغداويات
العام دي يجي تقولي حتا نجمع راسي، ماشي تعملي السربة دالخيل، الله يعملا لباباك


عمر الكرمي

الحلقات:  1  2  3  4  5  6  7  8  9  10  11  12  13  14  

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »