مستملحات عمي التهامي ومراتو رقية - الحلقة 13

بني يازغة الخميس, أغسطس 03, 2017
مستملحات عمي التهامي ومراتو رقية - الحلقة 13

هاد النهار عمي التهامي عطتو اللفعى
أ لطيفة أ سير دق علا القرطاشية تعطيك شي رويسة دالتوم، قوللا حتا للسوق ،
مشات لطيفة لطيفة،دقت علا القرطاشية ما كايخرج غير فريطو، ايوا قبطو الجماعة ونساااات التوم
ها عمي التهامي ماجي كاينككس، عطتو اللفعى من رجلو، والعروقات هابطة عليه، ومزيير علا رجلو بالزرة
رقية وااا رقية، بردعلي الحمار ديالي نمشي للسبيطار يطربولي شي شوكة راها عطتني اللفعى
اااه،!!!!،ايحا عليك!!!! ،وفايوخ هادشي وقعلك؟؟؟؟
أ طلق راسك دغيا!! عاد كاتسولني، فايرراها لطيفة؟؟؟؟
اعاين نشوفا راها مشات تجيب التوم عند القرطاشية؟؟
صافي راها تكون قابطة الجماعة مع فريطو، قلت لك ماتعاودش تصيفطا ليلم؟؟؟، بناقص من هاد النوم؟؟؟
مشات رقية كاتهرب تعيط علا لطيفة،
أ ياجي يا ديك الماسخة الله يغررق لباباك الشقف؟؟؟، باباك راها عطتو اللفعى!!! ماشي يموتنا هنا؟؟؟
ااااه، ايحا واش بصح ايما؟؟؟؟؟
جاو كايهربو كولم، حتا فريطو معاهم
دخلو كايجبروه سخفان والعروقات نازلة عليه
مشا فريطو كايهرب، جبر واحد البيكوب دخلت للدوار، جابت شي علف، ايوا قالالو وماجي معاه، طلعوه للسبيطار، طربولو واحد الشوكة، وقالولم عبيوه لصفرو، مشاو للابيلانص جبروها خاسرة، كايمشيو للطاكسيات، ركبو ومشاو للسبيطار دي صفرو، دخلوه ،ايوا قبطوه ينعس تما، وهوما رجعو بحالم، الليل طاح عليهم وماعندم فاين يباتو، حتا لغدا ويرجعو
بقا عمي التهامي مسكين ناعس، وحداه واحد الدري صغير، من صفرو خبشتو القطة، حتا هو ناعس فالسبيطار، جابولم العشا، داكشي ماقدالوش، جابو الفطور، وااالو، جابو الغدا، ديك الماكلة دالسبيطار عمي التهامي ماتعملو والو، كاياكل ديالو وديال الدري، ومازال فيه الجوع
هاداك الدري كاتجي يماه كاترگب عليه فالصباح والغدا والعشا وكاتجيبلو الماكلة، كاياكلا غير عمي التهامي،كيقوللا ا ماما راني كانعطيها لعمي الغول!!!
جات واحد الطبيبة كاتقلبو وتشوف الحالة ديالو كيف بقات، قاللا ا بنتي، يانا راها عطتني اللفعى من رجلي ماشي من كرشي؟؟ عطيوني ناكل؟
قالتلو علاه ماكايعطيوكش الماكلة؟؟
اخلاه ابنتي كان هاديك ماكلة؟؟؟ الله يسععيهالي
ها رقية ولطيفة ومصطفى وفريطو وبناتو دي مزوجين، ماجيين يرگبو عليه
اوياك الكفرة بالله، سييبتوني هنا ومشيتو، هادو قتلوني غير بالجوع
رقية ماجية مثقلة بالماكلة طايبة والخبز دالفرنة، ايوا التهامي اعتق بوحبل وداك الدري غير كايشوف فيه،
اجي اوليدي تاكل معاي،
الدري مسيكن حشمان غير تفتف معاه، ورجع لور، وعمي التهامي كمل الطنجرة
صافي قالولم غير عبيوه لدارو تما يكمل الدوا راه برالو رجلو
هو بغا يخرج وداك الدري عنقو وبدا كايبكي وللف عليه كان كايعاودلو المحاجيات فالليل حتا كاينعس، هو بغا يقوم وزاد فريطو قالو أ قبط فيا وتككي ا عمي التهامي ونوض
نتككي عليك؟؟؟ الناس كاتكي عل الرجال وانا نتكي علا فريطو!!
تكلمت رقية، أ لاواه ا التهامي هو دي جرا وجارا معاك فالسبيطارات.
عمر الكرمي

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »