مستملحات عمي التهامي ومراتو رقية - الحلقة 12

بني يازغة الخميس, أغسطس 03, 2017
مستملحات عمي التهامي ومراتو رقية - الحلقة 12

هاد المرة عمي التهامي هو دي ماشي يمشي لفرنسا
أ رقية راني سمعت كايقولو دي گووز مع العسكر دي فرنسا، وماعطاوهش لانتطريط، يجمع لوراق ديالو ويدفعم، يقدرو يعطيوه شي حاجة
ايوا انتينا ماگووزتشاي بزاف، دغيا رجعت بحالك
التهامي دفع الاوراق وعييطولو، وقالو لو راه تقبل الضوسي ديالك، ودبا خاصك تمشي لفرنسا، راها كاينة تما جمعية دي مكلفة بهادشي
ا رقية اجمعلي الحوايج ديالي، يانا ماشي نمشي راهم عاملين معانا نهار تمنطاش فهاد الشهر تقللع الطيارة
وجهك وجه الطيارة يا بلعور ،ايوا عييط علا ابنك الحسين يلاقيك لتما ايلا تنتلف؟
وليه يانا بحالك يا العمشة، راني گووزت تما خمس سنين، ايوا تهلا فالبنت، وقلو لمصطفى يكون راجل،
ا لطيفة ،ايوا تهللا فيماك وماتبقاشي غير مگابلالي داك فريطو، والله ياباباك وسمعت عليك شي خبار، حتا نسمحلم فدوك الزگامط ونجي نقتلكوم بجوج؟
سميتو عبدالعالي ابا؟؟؟
الله يعلليو باباك المداري!!!،مابقيتشاي كاتحشم؟ بشيد السلگوم؟؟ ايوا هاني علمتك!!
مشا عمي التهامي لفرنسا، تلاقاه بنو الحسين، وصلو لديك الجمعية دي مكلفة بيهم، عندم الماكلة والنباتة، ايوا خلاه تما ومشا
نهار الاحد ارجع لعندو
اشخبارك ابا لاباس عليك، ولفتشي شواي هنا
مع هاد الناس، كايتهلاوشي فيك
ايوا هاحنا ابني، اللهم لك الحمد، لا هاد الناس في حق الله كايتهلاو بالماكلة والنعاس والفراش والطبيب كايجي كل مرة كايگووزنا،
ايوا مزيان، يا الله ابا نخرجو ندورو شوية وتفوج علا راسك، راك تكون قنطت هنا
ايوا خرجو كايدورو
اييه يا فرنسا نهار كنا فيها يابني ماكانشاي هاد قووات البني والديور وهاد العلو بزاف
ايوا ابا راه الدنيا كاتبدل، دبا راه واحد الربعين عام هادي فاش كنتو هنا
ايييه تكون ابني تكون
قولي ابني اشناهي هاديك دي كاتبان كللا خضرة بالشجر والربيع ؟
هاديك ابا الروضا دالنصارا، القبور ديالم
وياك!!، ايوا شوفلك يا بني، القبور كيف عاملين، وحنايا ديالنا كايرعاو عليهم الكسيبة
ابني يبغيو يخليونا ندخلو نشوفو؟؟
اييه ابا، اجي نقولوها لداك العساس
ايوا دخلو للمقبرة، وبدا الحسين كايورري لباه، هانتين ابا، هذا عاش 10 سنين، وهذا عاش 6 سنين، وهذا عاش خمس سنين
اوليدي شفت هاد النصارا كايموتو صغار، ماكايعيشوشاي
ا لا ابا؟، هادو كايوصيو ولادم غير يموتو يكتبولم داكشي دي عاشوه مبررعين كايقلو انا عشت 10 سنين غزاااالة، وخا هو عاش 70 عام فعمرو.
وياااك!!، ايوا ابني يانا ماشي نوصيك من دبا، غير نموت كتبلي علا قبري
هذا قبر، المرحوم التهامي بن اعمر ،من كرش يماه للقبر
ههههه لاواه ابا ليه حتا نهار ماعشتو مزيان؟
أخلاه الحسين من الطنيز، حتا ديك الخمس سنين، دي گووزنا معاهم هنا، كانو كايجيبونا نحاربو ويردونا فالكاميونات، القط فالخنشة
عمر الكرمي

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »