قصيدة بن يازغة الحبيبة لعمر الكرمي

بني يازغة الخميس, يوليو 20, 2017
قصيدة بن يازغة الحبيبة لعمر الكرمي

السلام عليكم ورحمة الله تعالى وبركاته
اخواني اخواتي الكرام والكريمات، المتتبعون والمهتمون بالشأن الثقافي والشعر الزجلي والقصائد والسرابات من التراث المحلي، اقدم اليكم قصيدة من المقامات الطويلة، اتمنى ان تروق اعجابكم، تحت عنوان: بن يازغة الحبيبة.
وايا بلادي الحبيبة و راك نوارة
هجروك ولادك وبقيت صبارة
وكاتعاين فيهم عوام وشهورا
وشحال ما طالت الغيبة لازم نزورا
وخا غير ليلة ونهار فالعام

ويا بلادي العزيزة وراك نوارة
مافيك سقوي ارضك راه بوارة
العيون فيك نشفو وبقات قطارة
ماجيت علا الشط مافيك بحارة
ماكايوصلك تران ماتنزل فيك طيارة
وغير كار واحد علا طول ليام

ويا بلادي الحبيبة وراك مضرورة
انتركووو الجنانات وغابت الخضورة
البلدان زادت وانتين هابطة حدورة
مافيك طرقان كبار فيك غير منجورة
ويلا تلاقا الحديد نطلبو السلام

ويا بلادي العزيزة بلاد الشورافا
الجود والكرم والناس ظورافا
واراه دي زارك ترحب به مضيافة
ماكايسخاشي يمشي بهواك وللافة
ماكايحس فيك بقنط ولا التخمام

ويا بلادي الحبيبة والعز لرجالا
وفين ما مشاو علا كتافهوم عوالة
ماكايعرفو غش ما هم جوهالة
ماكايعرفو سرقة ما هم قتالة
وكولشي بالصفا والنية راه خدام

ويا بلادي الحبيبة والعز لبناتا
وافين مانزلت تطلق النباتة
صبارة عل القليل وما هيش شماتة
ما كاتحب طلاق ما تعيش بثلاتة
ما كاتسمح فولادا وخا يكون عرام

وايا بلادي الحبيبة والعز لولادا
شباب كولهوم طاقة وراهم اوتادا
العلوم والثقافة والادب والرياضة
وا هازين المشعل ومانساتش بلادا
ومابرتاح البال حتا يتهز العلام

وايا بلادي العزيزة وترابك محبوبي
ويلا هجرتك انا هاداك راه مكتوبي
وراه مني عدد فالسلاح والجيوبي
راني فالشوق ديالك والشوق داحبابي
ماكاتغيب من عيني حتا فالمنام

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »