مستملحات عمي التهامي ومراتو رقية - الحلقة 9

بني يازغة الجمعة, يوليو 28, 2017
مستملحات عمي التهامي ومراتو رقية - الحلقة 9

عمي التهامي جابلو بنو الحسين واحد البورطابل، ايوا عملو العلة الكحلة.

- ا رقية يانا طالع للسوق، خاصك شي حاجة؟
- ايوا كولشي خاص، الزيت الرومية تقاضات والملح والخميرة والسكر وو
- باركة صافي صافي، يانا ماشي نعمل بناقص من هاد السوق
- ا التهامي، أ جيب معاك شي مياتين ريال دالهضرة، نعملوها فهاد الشقف ماشي نهضر مع فوزية، قالتلي لطيفة راها كاتوحم عل البوبال
- ايوا دبا عاد كملت!!، قالوها اللوالا، قالو اهضر ماحد الهضرة فابور، دبا ها حنا كانخلصوها
- ايوا هضرت رقية مع بنتا،وسالات، وهو يصوني البورطابل
- لطيفة وا لطيفة، اجي شوف شكون دي كايعييط، هاد الشقف راه خارج عقلو بالغوات
- اه، هذا خاي الحسين، كايعييط من فرنسا
- اش خبارك اخاي، لاباس عليك، هانا نگووزلك يما تهضر معاك
- الو، اشخبارك ابني، اشخبارك شويش، ايوا كيف عامل مع الغربة، شخبار ديك النصرانية، سلمت ياو مازالة كافرة


ها التهامي داخل


- ماكاينشي كافرة قدك يا رقية
- مع من كاتهضر ا رقية
- هذا بني الحسين، راه كايسلم عليك
- مالك ا التهامي كاتلمح وتبرم فصباعك؟؟ هاك ابني نگوزلك باباك يهضر معاك
- اشخبارك ابني، ايوا كيف راك مع الغربة، الله يرضي عليك ابني، ايوا ماتجيشاي، اه، ايوا الله يعاونك ابني
- ا رقية انا كانلمحلك بصباعي، زعم قلو يصيفط الفلوس، وانتين بحال الهبيلة،؟؟ او كاتبهلل عليا؟؟
- ايوا هانتين هضرت معاه، قولالو انتين؟ او انتين كاتحشم؟ ويانا وجهي مقزدر؟ ايوا صافي دبا راه قطع


العشية داخل، كايسمع الهضرة فالبيت دي لطيفة؟؟؟، كاتقول، ايوا وقتاش تجي للدار خلاه، راك عييتني بالهضرة،


- اشكون ا لطيفة هذا؟؟؟
- ابا هادي اختي فوزية،
- ولاه كاتقوللا تجي للدار؟؟
- قالت لك كاتوحم عل البوبال،
- وياك، هادي فوزية؟؟؟؟ ايوا راني ماشي نشقفو عل الراس دي باباك، وهاداك فريططو، حتا نلاقي باباه ونقرطولك من طهرو، ابنت الدليل

عمر الكرمي

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »