هاد النهار عمي التهامي ومراتو رقية وبنتو لطيفة ماشي يطلعو كولم للسوق
التهامي ماشي نطلع يانا ولطيفة للسوق، البنت ماشي تبعيع دوك العقيدات ويانا ماشية معاها نشوف شي سبنية وشي سروال راه مابقاليشاي،
انا ماعنديش ا رقية!!، دوك الزگامط دي صافط ابنك، شريت بيهم الزريعة دي بطاطا ودي بقا راكوم كاتاكلوهم
ايوا صافي راني حايطة واحد الالفاين خللاهالي ابني، غير كاتبكي وتشكي يا هاد الخطية
ايوا سيرو ركبو فالراكوب، انا ماشي نمشي عل الحمار، نغييرلو ونشريلو البردع
ايوا مشاو للسوق، لطيفة باعت العقد، وخللات يماها فواحد القيطون، كاتاكل السفنج، ومشات كاتشري مقيبطات وتشوف ايلا بانتلا شي حوييجة تشريها، كايلحقا واحد الدري،
ا ختي سمحلي نهضر معاااك؟
أ سير للخلا، قالا تهضر معاي، لياه فاين كاتعرفني؟
ايوا غير اوقف نسولك، لياه كاتزرب، او مسخرة للقايد؟
ا اذهب من قدامي!!، بشيد الكمارة، ايلا ماشي نهز واحد الحجرة نهررس الفا دي باباك؟؟؟
أ هايانا غير اطرب ا الغزالة، الحجرة من يدك تفاحة، ههه
ها عمي التهامي گايز من حد القياطن وكايبان لو هاداك حدا لطيفة
اش كون هاداك أ لطيفة؟؟؟؟
الدري، اهرب وادخل فدوك القياطن اوياك أ قبيحة السيفة، گالسة كاتهضر معاه؟؟؟؟
أ والله ابا ماهضرت معاه، هو دي لاصقني، وانا كانقلو سير بحالك ماشي يشوفك ابا،
فايرراها يماك؟، فاين خلليتا؟ وگالسة كاتسلگط، ايوا بلاتي علا باباك نوصلك للدار؟
لطيفة مسكينة ماعملت لا بيدا ولا برجلا، غير متهومة
ايوا مشاو للقيطون، كايجبرو رقية كاتلووي فالسفنج وتگووز باتاي
أوياك ارقية،؟؟نتين گالسة كاتاكل ومخليا بنتك تابعينها الزوافرية؟؟؟
أ مالك انتين اقبيحة الشوفة؟ فاين مشيت، وياك قلت لك اگگس حداي
أ التهامي، أ خللص هاد السفينجات دي كلت؟
وياك!! انتين تاكل ويانا نخللص؟
اشحال كلت هادي المعلم؟
ربعة بالبيض وتمانية خاويين
بالبيض؟؟؟؟؟ يا والله لا خللصتم، مزيان وتبارك الله،قالك البيض، ماكلتمشي يانا؟؟
أ ياجي التهامي خللص غير دي خاويين
قوم البنت سير لحقو قلو يشري الحوت
أ لا والله مانلحقو، انا راه حالف فيا، ها مصطفى ماجي، قولالو
أجي بني الله يغطيك بالرضا، سير لحق اباك، قلو يشريلك الملخة، ويعطيك باه تحسن ديك الشكرودة، ويشوف ايلا جبرشي حوت مزيان، يشري واحد الكيلو
تبعو مصطفى كايهرب من موراه
ارا يدك ابنتي نقوم ركابي كايحرقوني
ايما لحقني واحد الدري، وقالي الغزالة
واش يانا غزالة؟؟ هههه
وليه أ قبيحة التخنزيرة مالك؟ اش ناقصك؟، راك شابيا فيماك، نهار كنت قدك العزارة كولم تابعيني، يا الله نشوفو الراكوب، ايلا نبقاو هنا، باباك راه عندو الحمار، دبا يلحق علينا، ارا ا بنتي واحد المياتين نعطيوها لهاد مول السفنج
أ جبد ايما الالفاين، وانتين ماكاتسخاشي تصرفا،
الله يجبد لباباك العيناين، زيد خلفة قدامي، وانتين شابية فباباك، أ بشيد السلگوم!!
عمر الكرمي
