مستملحات عمي التهامي ومراتو رقية - الحلقة 6

بني يازغة الأربعاء, يوليو 26, 2017
مستملحات عمي التهامي ومراتو رقية - الحلقة 6

عمي التهامي هاد النهار مشا يحرث، وماشي يجي المقدم للدار ويجبر غير مراتو رقية .

- ا رقية هاني مشيت نحرث فديك تاغدة، غير يجي الولد من القراية عطيه الغدا يجيبولي، ايوا عاود خليهلي حتا للعصر
- أ لا هايانا عاجنة بكري، ماتخافشاي،ايوا شوف ايلا تكون نسيت شي حاجة، وتم راجع

رقية نصبت الغدا، ومشات كاتقررص الخبز فالكانون، جا الولد من المدرسة، سييب ديك الشكارة من الباب، ومشا سللم علا يماه، وخارج.


- أ ياجي اداك الجيفة، فاين ماشي؟
- اهيانا غير مع الدراري كانلعب
- ا ماتعطلش، باه تعببي لبباك الغدا، راه كايحرت، وعببيلو بوفيشل راه نساه
- ولياه هو نسا بوفيشل؟
- ايوا غير تعببيهلو ،قولالو، كما يقرطو علا باباك، أمكررع الفا، مابقيتشاي كاتحشم ا صفر الجعاطر


خرج مصطفى وخلاها كاتهضر بوحدا
ها المقدم وصل وبدا كايدق فالباب


- أ شكوون؟؟؟، أ عاين هايانا ماجية، أ عاين راها الخبزة عندي فالفراح، ايوا هررس ديك الباب،!!!
- آه، المقدم، اشخبارك اوليدي، ياك لاباس هاد المجية، ياك ما البرا دي بني الحسين، ما حت الماندا كاتعطيها لعمك التهامي
- لا خالتي رقية هادو الكارطات د التصويت، ديالك ودي عمي التهامي
- ودي بنتي لطيفة؟؟
- لا خالتي رقية ،لطيفة مازالة صغيرة
- لاواه اوليدي، راها صامت عادي عامين
- أ خالتي رقية حتا توصل تمنطاش
- وياك اوليدي، ماكاتخفاشاي عليكوم شي حاجة، قولي المقدم، قالي عمك التهامي، حنا ماتقيدناشاي هاد العام،
- أ لا خالتي رقية، دبا كولشي مقيد فلورديناطور،
- قولي أ المقدم، ماتكونشاي نتين دي قلتالو؟
- شكون هو أ خالتي رقية؟
- هاد الحربان الكحل دي قلتلي
- آه، لورديناطور، خالتي رقية الله يهننيك، نتين كاتجبدلي لساني للهضرة،
- ايويوا عليك يا المقدم ماكاينشي ديناطور قدك، ههه
- اش كاتقول اخالتي رقية؟؟
- أ قلت لك اوليدي سللم علا يماك
- أ المقدم، الله ايلا ما قلو لبني مصطفى راه كايزمردح مع الواشون، يجي يعببي لباه الغدا
- أ وخا أ خالتي رقية، مابقيتوشاي كاتوقرو المخزن؟

عمر الكرمي
بني يازغة، بنيازغة،  benyazgha, beni yazgha 

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »