مستملحات عمي التهامي ومراتو رقية - الحلقة 4

بني يازغة الأحد, يوليو 23, 2017
مستملحات عمي التهامي ومراتو رقية - الحلقة 4

عمي التهامي عندو واحد الولد ف فرنسا، سميتو الحسين، جا فالصيف وقالو لباه
- ابا راني بغيت نعببي يما معايا لفرنسا، شوف كيف عاملة مريطة وحالتا صفرا، يانا كانصيفطلك الفلوس باش تمتعو وتداويها وانتين كاتشري فالمطاير. 

رقية بدات كاتمسكن وعجبا الحال، ماشي تمشي لفرنسا، ههه

- ايويوا يا بني علا بلعدو لاخور، كايمشي نهار السوق للقياطن كايبقا يسرط فالشوا مع راسو ويانا كايجيبلي ديك الرويسة دالجدي قد القطييط، ويقولي ماتحاديش اللسان، او شبقا فيه ابني؟  الخواشم والفيسان

- اوياك ارقية دبا عجبك الحال، جاتك علا گانتك، كاتشكيلو، ياك داك النهار عاد جبتلك دوارة علا كمالة، تاكل فيها جغديد
- واصافي ابا انا ماشي نعببيها معايا، نگووزلا وترتاح معايا شوية ونجيبا
- أ غير سيرو من قدامي 

ايوا الحسين عببا يماه، لفرنسا، هو خدام ومراتو خدامة والدراري كايقراو، كاتبقا مسكينة بوحدا، وهو كايوصي فيها، 

- عنناك ايما تخرج تمشي تنتلف هنا وماتعرفشي حت الدار
- لاواه اوليدي لياه انا صغيورة عاد توصيني

رقية طاقت وقالت بلاتي نخرج غير للباب نشم شويش دالهوا، خرجت وهي تزعم وقالت نطلق رجلاي، طولت المشية دارت موراها جبرت راسا وسط النصارا وباب الدار ماكاتبانش

- ايحا عليك ارقية تجليت عل الدار
وبدات كاتسول فالنصارا

- أ بني ماشتنيشاي مناين خرجت؟

النصارا ماكايفهموهاشاي اش كاتقول

واحد شوية قبطا واحد من كتفا، ديك الدورة دي دارت، كاتجبر اسدي محمد ولد البلاد، صاحبو دالحسين

- شكون؟؟؟  ولد محجوبة!!!، اش خبارك اسدي محمد، اشخبارك شويش، شخبار يماك، كيف بقاتلا ديك العين، باقية كاتدمعلا؟، اجي يابني وصلني للدار دالحسين، وعناك تقولالو، ايلا يمشي يغطب عليا.

بني يازغة، بنيازغة،  benyazgha, beni yazgha

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »