مستملحات عمي التهامي ومراتو رقية - الحلقة 3

بني يازغة السبت, يوليو 22, 2017
مستملحات عمي التهامي ومراتو رقية - الحلقة 3

رقية قالت للتهامي خليلي واحد المياتين ريال، راني معروطة فالعرس، منانة كاتجوج بنتا، وراهم عاملين الفراجة. 
قالا التهامي: بلاتي ارقية راني سمعت داك النهار الفقيه كايقول هادشي حرام، نمشي نسولو ونرد عليك الخبار.
- لاواه التهامي لياه حنا شحال هادي وحنا كانحضرو ويحضرونا فالعراسات، حتا جا هاد الفقيه، عاد ارجع حرام. 
- ايوا خليني نسولو
- السلام عليكم الفقيه
- وعليكم السلام، التهامي اشخبارك، ياك لاباس هاد المجية؟ 
- لا لاباس الفقيه، غير بغيت نسولك واش حلال ياو حرام المرا تحضر فالعرس وفيه الفراجة والهرج
- لا التهامي، حرااااام
- داكشي دي قلت لك ارقية، قالي حراااام
- ايوا بناقص خلاه ا التهامي

لغدا، رقية كايزة وكاتجبر العيالات كايتجمعو عل العرس، ايوا شعملت مراتو دالفقيه بالشطيح والرديح، وكاتشطح بالصينية بالكيسان عامرين فوق راسا. 
وياك، هادي مراة الفقيه؟، وايييه ارقية، خيار ا الفقيه، مراتك حلال عليها ورقية حرام عليها، ايوا بلاتي عليك التهامي انتينا وداك الفقيه ديالك. 

- امسا الخير ا رقية، 
- ومناين جاني هاد الخير
- لياااه وياك لاباس؟ 
- البارح كاتقولي الفقيه قالك حرام ومراتو بايتة فالعرس عل الشطيح والرديح؟ 
- كيفاش؟ هادي مراتو دالفقيه، وا يييييه ا التهامي!!! 
- قبط هاد القفة هاني راجع
- اجي يارا المنجل، ايلا تمشي تعمل شي مصيبة فيه وتخلليهانا فضيحة
- الفقيه لياه كاتقولي البارح حرام المرا تحضر فالعرس ومراتك بايتة عل الشطيح؟ 
- ا التهامي نهاك الله، غير بشوية مالك مقلق، انتينا سولتني، واش حلال ياو حرام، ماسولتنيشاي، علا مراتي واش ماشي تحضر فالعرس

بني يازغة، بنيازغة،  benyazgha, beni yazgha

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »