السلام عليكم ورحمة الله تعالى وبركاته
اخواني اخواتي الكرام والكريمات المهتمين والمتتبعين للقصائد الشعرية والزجلية والسرابات للتراث المحلي اقدم لكم هاته القصيدة، اتمنى ان تروق اعجابكم، تحت عنوان واهيا داك الزين.
واهيا داك الزين
زين البشرة والعينين
والحجبان طبيعيين
تحلف ايلا مرسومين
والشعر رطب زوين
بلا صبايغ والا تلوين
هابط عل الكتاف مسبسب حرير
واهيا داك الزين
زين الضحكة والتبسيمة
ثقبة الزين مختومة
تحت الخدود مرسومة
يعشقوك ولاد الحومة
هلكتني يانا وانتوما
يتمناك الكبير والصغير
واهيا داك الزين
زين الحروف والاشفار
والعيون كوحل كبار
والفم مقاد ومدوار
كايسيني بالخطر
واللباس مزيير تزيار
دي يشوفك تشعل فيه النار
يطلب يدك فالحين وبيك يطير
واهيا داك الزين
زين الوقفة والطولة
كلمة الحق نقولا
راك سالبة العقولا
وخا فالشوفة حولة
عامرة فالشكل مقبولة
مايوصلك غير المعلم فالزين وخبير
واهيا داك الزين
زين البيضا والشقرا
والعين رقيقة خضرا
والشعور مذهبة صفرا
شحال غزالة فالنظرة
بشوفتا تضرب لك ابرا
تسمح فالولاد والمرا
وتنسيك فالاشغال والمصير
واهيا داك الزين
والطولة والتجريدة
جاية من بلاد بعيدة
الفورمة لاطاي عريضة
والمشية غير بالقاعدة
والشعر مقاد بليميش قصير
واهيا داك الزين
والزين د الصحرا
ها الطولة والعمارة
تضوبل ديالنا علا عشرة
مزوقة وجامعة شعرا
ماتشبعكشي هضرة
والملحف ساتر العورة
مانقدلاشي صداقا ناگة وبعير
واهيا داك الزين
والزين دجبال الريف
التباتة وشحال ظريف
و النفس عندا فالنيف
ماتزوجكشي حتا بالسيف
بن عما ماجي فالصيف
يهزا فالحديدة ويطير
واهيا داك الزين
والزين د شرقاوة
راه المليح والفتاوة
والمعقول والنقاوة
يقتلو بالسيوف والجناوا
بن عما عل الدم يغير
واهيا داك الزين
والزين رطب املس
كانقصد جبال الاطلس
ناشطين فالحفلة والعرس
مايخليوكشي تنعس
تفرح معاهم وتعللق الفلس
و تجي بجيبك يصففر تصفير
واهيا داك الزين
والزين دي كازا
تابعة الاشهار فالتلفزة
عايشة بالسناك والمخبزة
ونسات كصعتا ومهرازا
مگابلة الموضة فالطويل والقصير
واهيا داك الزين
والزين دي دكالة
النسوان قادة بشغالا
وتعاون فالحرث رجالا
مگابلة الغنم والعجولا
زارعا الارض عرض وطولا
مصييفة الاطوان دالقمح والشعير
واهيا داك الزين
والزين الصفريوي
بلا زواق راه مضوي
دي يشوفو يبقا مكوي
يتقن الحرشة والملوي
ويتفنن فجميع الحلاوي
جمعلي يانا المطاوي
وكسر قلبي تكسير
واهيا داك الزين
زين الجبال ولطهور
والشعر كحل ومضفور
والوجه ابيض ومبشور
والنيف مقاد ومنجور
بلا فشوش ولا تكبر
كان جدو ينظم الهضور
شيخ معروف ماشي مهجور
زين بويبلان ورباط الخير
واهيا داك الزين
وزين بن يازغة بالذات
العقل والرزانة والتبات
حادگات وفنااااات
راهم فالدار كيف الحمامات
تخدم الصوفة و عقيدات
او تغزل من الحريرجعيبات
وتصبر معاك عل القليل والكثير
واهيا داك الزين
وحتا زين ماخطاتو لولة
بيبان ربي محلولة
ونطلبو الله تعالى
توصل عندو مقبولة
وتكون الصورة مكمولة
مافيها عيب ولا تزوير
واهيا داك الزين
زين التربية والاخلاق
مايهموشي الزواق
كولشي لعندو عشاق
ماعندي عليه فراق
مايطلب مليون فالصداق
كايهمو المعقول وكلام الخير
