لحبيبة بن يازغة - خالد لهويتي

بني يازغة الثلاثاء, أبريل 11, 2017
لحبيبة بن يازغة - خالد لهويتي

لحبيبة بن يازغة - خالد لهويتي

هذه القصيدة مهداة لليازغيين واليازغيات عموما وللسيدين المحترمين نجيب التريد وعمر الكَرمي خصوصا.

واهيا لبلاد وهيا لبلاد 
فرحتي بك أيا لبلاد 
ناسك كراما وجواد 
من تاغيت وأنت هواد 
حتى لقنطرة دسبو 

واهيا لبلاد واهيا لبلاد 
جيب الغيطة والبندير
نفرجو الصغير والكبير 
راه لعمر دبنادم قصير 
ولهموم علينا غلبو

واهيا لبلاد واهيا لبلاد 
قم نديرو شي دورة 
ونبداوها من كركورة 
بلاصة لما والسدرة 
وعند الواد نشربو 

واهيا لبلاد واهيا لبلاد 
مرحبا بكم فمطرناغة 
حنّيو وديرو الصباغة 
وجدو الجلابة والبلغة  
راه الموسم حان قروبو 

واهيا لبلاد واهيا لبلاد 
مرحبا بكم فالقصبة 
فمجنان ولا فالشعبة 
ناسا عزازين وصحبة
ما نافقو ما نكذبو 

واهيا لبلاد واهيا لبلاد 
مرحبا بكم فملاحة 
تمّا الزين الصراحة 
ها صفية ها صليحة 
شاور ولدك وخطبو 

واهيا لبلاد واهيا لبلاد 
مرحبا بكم فتاغروت
أرض الحلفة والحانوت 
على بلادي نحيا ونموت 
واخا نكون صغير كنحبو

واهيا لبلاد واهيا لبلاد
مرحبا بكم فتاغيت
وفيها شحال تساريت
فجبل مالو غنيت 
ورعيت النعاج وهربو 

واهيا لبلاد واهيا لبلاد 
مرحبا بكم فمغيلة 
أرض الزيتون والغلة 
جيب المنفط والبغلة
وفرحى نطحنو ونكبو  

واهيا لبلاد واهيا لبلاد 
مرحبا بكم فدار حقون 
شحال تمّا وقلبي مرهون
سلباتو كحلت لعيون
خلاتو عايش فعذابو 

وهيا لبلاد واهيا لبلاد
مرحبا بكم فأولاد مكودو 
تشربو لحليب من لبيدو 
وتعبيو بيبي وليدو 
وتشكرو ربي وترغبو 

واهيا لبلاد واهيا لبلاد 
مرحبا بكم فأولاد مريان
شحال فيها الجو مزيان 
الطفلات فيها والصبيان 
خرجو ياجيو تلعبو 

واهيا لبلاد واهيا لبلاد 
المنزل ناسو صحاب 
وفالشدة ديما قراب 
كيف الخليفة كيف الكساب
كلها ينصر حبابو 

وهيا لبلاد واهيا لبلاد
مرحبا بكم فالقلعة 
ها لخير هنا دلگرعة 
دير كسكسو فجمعة 
وعرض على مينة وعبو 

واهيا لبلاد واهيا لبلاد
عشقي فيك أيا لبلاد 
جيت نكمل تسالا لمداد
غير سمحولي ويا لعباد
بن يازغة فقلبي وجنابو

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »