قصيدة أنا من سلسلة قصائد يازغيات لجمال أبو ريان

بني يازغة الأحد, مارس 05, 2017
قصيدة أنا من سلسلة قصائد يازغيات لجمال أبو ريان

جزء من قصيدة طويلة من الذاكرة وجدتها مهجورة في احد دفاتيري القديمة، كتبت في أواسط التسعينيات من القرن الماضي.
يازغيات - أنا

أنا محتاج لشي شميعة
تونسني شي سويعة
حتى نولف وكان
ونخليها قبالتي تضوي بيتي فالظلام.

 انا محتاج لشي دميعة
نخزنها فشي  ربيعة 
و نبرد على  قلبي  كل مرة
مدي نبكي  عل الايام.

 انا تألمت وعانيت 
وشحال ياسيادي قاسيت 
  والهم طال بيا وعمانني
  والو  ولا بغا يتفاجا الغيام .

انا قلبي عليل ما قادر على دمير
حساسي مغطوس فقاع البير 
ما هزوا هوى ولا هيام.
وفراق الاحباب زاد صعب علي الضيام .

 أنا دي طويت لساني
 انا دي ساكت طول زماني  
ما دويت مع حد ما دواني 
وانا دي نويت الصيام عل الكلام.

 انا ما بوهالي ما زهواني
ونا ما مسحور ما غيواني 
ونا ما يهودي  ما نصراني 
  و عمرني ما حللت الحرام . 

انا ما باغي نحاس ولا نقرة 
 ما باغي ذهب ما باغي فضة
 ولا باغي نسكن فقصر سواريه رخام .

 انا ما طامع فمال كثير 
ولا باغي نبدل الحصير
ولا أنا  باغي  نطير 
ولا باغي يكون عندي باطو فالبحر عوام . 

أنا يا سيادي ما بغيت غير التيقار.
والصحيحة وراحة البال
ونعيش فالهنا والسلام
هكذا بغيت ياربي  عل الدوام.

انا قلبي عليل ما قادر على دمير 
حساسي مغطوس فقاع البير
ما يهزو هوى ولا هيام 
وفراق الاحباب زاد صعب علي الايام


جمال ابو ريان 


commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »