يازغيات... مازال عاقل - جمال أبو ريان

بني يازغة السبت, فبراير 04, 2017
يازغيات... مازال عاقل - جمال أبو ريان

يازغيات... مازال عاقل...
       
مازال عاقل على وقت الحصاد .مدي مشيت لجنب الواد نجمع لبابا العواد .باش يشحر شي براد. خرجلي حنش بو سكا غير الكرت دي فكا.

ما زال عاقل على النهار د الدراس فالمنزل . مدي زعرط علي البغل وبقى يعطيني فالركل حتى مشى يجيبلي بوحبل.

مازال عاقل على داك النهار  مدي هرب الحمار من الدار خلانا واحلين فالغبار .
شحال دادينا عليه فالركن ولا حد ساقلو الخبار.

ما زال عاقل على ديك البقرة دي جاها طيكوك وسركحت جهة عين دكوك .ما صبناها حتى للصباح وطرعتا عامرا بالشوك.

ما زال عاقل على داك العجييل دي بقى ،غير خفنا عليه من السرقا. طلعناه للسوق دي نهار الاحد .قوس عليه ولد عمي احمد ، وتقول واش ساومو شي حد.

ما زال عاقل مدي قولنا  البيض كيتحتاج. ونضنا فالحين  كنربيوا الدجاج  ،طاح عليهم ولد الهرباج .حتى ما بقى غير واحد الفلوس. دبحو بابا فالحاكوز.

 ما زال عاقل مدي قلبناها قنية، قلنا كتنفع حتى هي .حفرت غارا   فالخربة  دل الهندية  ، حتى ولدات واصبحت كثيرة وتسلاطت عليها الثعلب الجنية .دي كلات الكبيرا والصغيرا .

مزال عاقل على ديك النعجة البركية مولات صبيحت السمية دي كنا  كنعيطولا لالا هنية وكتطلع لعندنا حتى المصرية . وشحال كلات معانا من خبز وقطنية.

مازال عاقل على ديك القطيطة كحلت الزبيطة. دي عاشت معنا سنين .كانت حابسا علينا الفار ،وتقول واش يدور  عندنا فالدار.

كانت واحد النهار كتكول الحوت قدام الحانوت دي مسلوت .كايز الكار دي صفرو قلاع .جابا حبل وبونت... وشحال بكيت
 انا دي كساع...!

 جمال ابو ريان

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »