قصيدة ”السكن الاقتصادي“ - عمر الكرمي

بني يازغة الثلاثاء, يناير 03, 2017
قصيدة ”السكن الاقتصادي“ - عمر الكرمي

بني يازغة - Beni Yazgha

عمر الكرمي

شفت الاشهار فالتلفزة
قلت هادي راها همزة
بحرر الكرا والنغزة
صبحت عندم فالادارة
****
غير وصلت ايا الاحباب
جبرت واحد واقف فالباب
من كلامو باين مصواب
قالي حنا رهن الاشارة
****
قلتلو بغيت حتانا نشري
ونكون ساكن بداري
مانبقاش ديما كاري
ومراتي تكون بدارا
***
دخلني لواحد الصالة
جبرت الناس احوال وحالة
قدامنا واحد الغزالة
صافية كيف البلارة
****
قالتلي التمن راه مدقق
قولي شحال تقدر تسبق
غير ماتنسانيش بلحق
ونعطيك دار مختارة
****
 عطيتا من تحت الطبلة
وابتسمت ديك الطفلة
نسساتني كاع القبلة
هاداك شغل المسرارة
****
غير سالات ايا الخوت
وعطاتني داك الساروت
كنت فواحد الحالة مزموت
ونطلقت لي البشارة
****
مشيت نفررح مولات الدار
قالت لي دبا عاد خيار
ونعيشو حتا حنا احرار
ونتهناو من الايجارة
*****
غير مشينا لديك السكنا
قلت دبا عاد نتهننا
من الزحام ومن المحنة
ومن صداع الشمكارة
****
كانجبر الباب الكبير متررع
والحيط كايتزعزع
وبنادم هابط طالع
والدروج بلا اينارة
****
عملت الساروت وحلليت
جبرت الصالة قد البيت
ايلا عطست او كححيت
كانقول طاحت العمارة
****
عطاوني الدار فربعة طاج
كانقييل نحسب الادراج
غير نوصل طهري يعواج
بحال لا طايح من طيارة
****
السانسور ديما خاسر
والصباغة كاتقشر
والبزبوز كايقييل يقططر
باش تعرفو دوك الشفارة
***
 مامهنني لا دي كاري
وما ممهنني لا دي شاري
هم الدنيا ديما جاري
ماتسترنا غير المقبرة

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »