القائمة الرئيسية

الصفحات

قصيدة بعنوان الرعدة والثلج - عمر الكرمي


قصيدة بعنوان الرعدة والثلج - عمر الكرمي
العنوان : الرعدة والثلج

يا اسيادي ونبدا من داك البرج
جات الرعدة ولييق الثلج
وتقطعو المسالك والفج
والويدان جايبة الحمول

ماجية الحملة هوادة
جابت الغابة بعوادا
وجابت القنطرة بحديدا
وضيعت سواقي وحقول

الفلاح حاير فالبلاد وترابا
ماحيلتو للفلاحة وعذابا
كل صيف يعاين الصابة
قنطار دالشعير ومداين دالفول

كيف يعمل داك المعذور
راه بين حيوطو محصور
خايف يطيحو الديور
ويصبح بين ولادو معلول

ماحيلتو للماكلة والشرب
والنار خاصو الحطب
والطير ماجبر ما ينقب
والثلج غططا الصابرة والگندول

والشيخ الكبير جاتو الموت
الغيس والجو مزموت
نتلفو وحارو الخوت
غطاوه بالثلج كيف الحوت
ماعرفو اش المعمول

الشيبانية صبرت وفاض الكاس
وخرجت تغوت يا هاد الناس
راه تقهرنا وفات القياس
غير شوفونا شي حلول

جات الاعانة للقيادة
وعطاو لهاداك وهادا
جات المسكينة ب ولادا
جبرت كولشي تقاضا
رجعت كاتزطم فالجلول
*****
كيف تعمل هاد الدرويشة
حايرة غير مع المعيشة
كاتغللب عل التيشة
وتسككت ولادا بالبلبول

المرا حاملة فالشهر التاسع
تزيرت وجاها الوجع
والراجل يرغب وشكون دي يسمع
وتجمعو الناس والعين كا تدمع
والطريق مقطوع عرض وطول

بقات المرا مهمولة
تستلطف وتقول لاحولة
دعوة المظلوم مقبولة
واصبح النعش ديالا محمول

وجا مسكين داك المزغوب
من حالتو باين مغلوب
سيفتو كاتشفي القلوب
عطاوه صندوق باين محلول

واحد مسكين بايت فالزنقة
يدو نقية من السرقة
غطاه السما وفراشو ورقة
صبح كارم ومشلول

هذا حال الدراوش والفقرا
ساكنين فالجبال والقرى
عايشين بالمطفية والمطمورة
كايقاسيو جميع الفصول

وعلاقة بالقصيدة، إليكم تجميعة لفيديوهات تساقط الثلوج على منطقة بني يازغة.