السلام عليكم ورحمة الله تعالى وبركاته.تحياتي الحارة لجميع اصدقائي واحبابي ،والمتتبعين والمهتمين بالقصيدة الزجلية والتراث المحلي.اقدم لكم هاته القصيدة بشكل اخر، وقافية اخرى، اتمنى ان تروق اعجابكم.
البارح كنا مجموعين
فالدراز والقهوة والعين
عل الحصير والحجر والطين
مشاركين الافراح والهموم
اليوم رماتنا الاقدار
شي خوا البلاد والدوار
وشي قطع الرمل والبحار
كل واحد فمصيرو مردوم
البارح مجموعين فالنادر
علا جنابو مفرشين هياضر
الصينية والبراد مشحر
وفالحيدوس هاززين بنادر
كولشي فرحان براني وعموم
اليوم كولشي رجع بالاثمان
الفللاحة غارقين مساكن
والتجار رابحين الاطنان
فالقمح والبصلة والثوم
البارح كنا كاملين فتوازة
فدان عرس ضالة وگنازة
والمرا جايبة كصعتا ومهرازا
مشمرة وجامعة الكموم
اليوم تقهر الدرويش والفلاح
دي بغا يبني يجبدم صحاح
والعرس فقاعة الافراح
والمعروض بالبرية معلوم
البارح بيبان الديور محلولة
ادخل كول وهز فندولة
والصبيان مجموعين علا بززولة
راحنا خوت فالرضاعة والدم
اليوم كل واحد بيتو سادو
مصروفو بحرا قادو
واشغالو يعملا بيدو
مايحتاج العوين والخدوم
البارح كنا فالجرا والكورة
رافعين الأعلام نسا وذكورا
نوال وعويطة ركبتم مدبورة
والتيمومي وبودربالة فالهجوم
اليوم شحال د الاموال مخسورة
عل السباع والنسورا
والملاعب صبحات مهجورة
بكثرة الشغب والهزوم
البارح كنا مجموعين فالقهوة
نعاينو المنتخب بالشهوة
يسجل ويزيدنا نخوة
والضحكة مرسومة عل الفموم
اليوم ايلا بغينا نربحو ونمررو
خاص لوخرين يخسرو
كايفوزو بحداش لزيرو
ونرجعو كل واحد فينا مكلوم
البارح كنا فالتعليم العام
رمز القوة والنظام
تخررجو كوادر وعللام
وموظفين فالعموم
اليوم نززلوه للسوق يتباع
بوشكارة يتحممل الربح والصداع
والمستوى هبط حتا للقاع
والدرويش هو وبنو مصدوم
كيف الماضي كيف الحاضر
بلادنا نفس التراب والحجر
نفس الربيع والشجر
غير بعض بنادم قلبو مسموم
كيف اليوم كيف البارح
كاين الطالح وكاين الصالح
دي بغا بلادو ناجح فالح
راه كايتبدلو غير الارقوم
تعليقات
إرسال تعليق