قصيدة بعنوان جيب العز ولا كحز - عادل اليازغي

بني يازغة الأربعاء, يناير 25, 2017
قصيدة بعنوان " جيب العز ولا كحز " - عادل اليازغي
قصيدة بعنوان : جيب العز ولا كحز

اها وبني وراين فالتلفزة
وانا نغوت من هنا حتا لتازة
حتى حسيت في قلبي حزازة
وخا نعيا نهضر والله لا نزاها

اها و حال بلادي يشفي لعدا
وحنا اللوالا واكلينها بهردا
ومع الفرانسيس بالتبوريدا
حاربناهم وجدي تاهو كلاها

وگاع ماعرفتشاي اشهادشي
وشي حد عندو مايقولي هناشي
والزمان غادي كيف ديما و ماشي
وحنا نعاينو الشمش طيح مسماها

الناس وصلات ومشات للاداعة
وحنا عين سبو بانت غير ساعة
وعطات الوقت غير لدوك الرباعة
علاش من غيرنا لقاها كيبغاها

الخير موجود ياجي غير دادي
الفن عندنا ومن بكري عادي
سول البكاري من قوالو النّادي
الله يرحمو مامشا حتى لقاها

أقالك حنا مانعرفوش لاحيدوس
واليازغي من غيرو احيدوس مسوس
أمانطلبو بيه جاه ماخصنا فلوس
أمانبغيو غير حقنا فالنزاهة

خنيفرة مشات بعيد بداك الفن
وحنا غير ناعسين فواحد الكفن
شيوخنا ماتو علاين شي قرن
وحنا لي بغى يزينها عماها

أيالاه يالحباب نمشيو يد فيد
وانا راني منكم نعطي العاهد
مانمشي تانقلب لي يساعد
يكون ولد البلاد وبقلبو شراها

بنيازغة راهم مهيابين من بكري
يعارفم الراجل والمرا والدري
من ديكان كايحبو تا بدا يجري
ويلا نيش على السيبلا مايخطاها

بقينا موخرين حكمت الظروف
وخا نحتنا السرابة والحروف
وفالحيدوس ندبحو لعجولة والخروف
خاصنا الشيوخ دي يقادولا بناها

الشيوخ راهم جاو ها خالي وعميمي
هادا ما  يكبرشاي على  ولاد السحيمي
محمد الرطيلي وعمر الكريمي
الحكمة عندهوم من سماها تا لماها

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »