قصيدة "الله يرحمنا وخلاه" - عادل اليازغي

بني يازغة الخميس, يناير 19, 2017
قصيدة "الله يرحمنا وخلاه" - عادل اليازغي
 بني يازغة - Beni Yazgha
دائما فخاطر بنيازغة فخاطر ناسها والاهل ديالا فخاطر الشجر دالزيتون ديالها والتراب ديالها والحجر ديالها والعيون ديالا وسواقيها والطرقان ديالا وفخاطر الهواء لي كانتنفسوه فيها وفخاطر الكلام لي كايجمعنا بيها وفخاطر الاحياء ليعايشين فيها والاموات لي مدفونين فارضها واموات المسلمين اجمعين وفخاطر الحب ديالي لبلادي وفخاطر اصدقاء الامس ديالها وفخاطر الذكريات الدافئة الحنونة ديالها والله يرحمنا بالشتاء:

 الله يرحمنا وخلاه الله يرحمنا وخلاه
مدي كاطيح الشتا
والفلاح ارضو حرتا
الخضورة بعيني شفتا
ايام الربيع غزالة

الله يرحمنا وخلاه الله يرحمنا وخلاه
كاتجي الصابة مزيانة
والنشاط غير بالگانة
الفلاح والكسيبة فرحانة
وكاينقي ديك الحالة

الله يرحمنا وخلاه الله يرحمنا وخلاه
والزيتون يدير الزيت
والطونا عامرة فالبيت
ومروّح بالزيت بريت
والشايط فسوق الدلالة

الله يرحمنا وخلاه الله يرحمنا وخلاه
ونهبطو نعومو فالواد
معمرين جنابنا بالزاد
كاملين بالرجال ولولاد
وحد مايلقي لبسالة

الله يرحمنا وخلاه الله يرحمنا وخلاه
نصيدو الشابل والحوت
ومن استيف نجنيو التوت
والجلسة تحلى مع الخّوت
من عين سبو لحلاّلة

الله يرحمنا وخلاه الله يرحمنا وخلاه
تاج الصيف فوق الطهور
البهمة كتيرة والعصفور
الصابة سقوية والبور
والشعير مايسّالا

الله يرحمنا وخلاه الله يرحمنا وخلاه
الدجاج وبيبي موجود
كيشبشلو على دوك الدود
ونبيع داك العنقود
ونشريو البوط لرجلانا

الله يرحمنا وخلاه الله يرحمنا وخلاه
الفوضا تكون خلاّقة
خود لقياس من السرّاقة
وحافظ شويا عالطاقة
گاع ماتجيك جلالة

الله يرحمنا وخلاه الله يرحمنا وخلاه
ادغس والبيض البلدي
ايا فرحي ويا سعدي
فالفطور جيو لعندي
خبزنا مكاينش بحالا

الله يرحمنا وخلاه الله يرحمنا وخلاه
الخرشف وشويش دالعتلوج
والعطرية من لمعالق جوج
النصبو فلغدا فروج
ونرميو ديك الضالة

الله يرحمنا وخلاه الله يرحمنا وخلاه
هذا عشاك أغنضور
الفول واللفت المحفور
والحريرة فوق الطيفور
و البيض عند جبالة

الله يرحمنا وخلاه الله يرحمنا وخلاه
كاتفيق على النبّوري
تحتش المازوزي والبوري
المداود عامرين فالكوري
للغبار لقديم بدّالة

الله يرحمنا وخلاه الله يرحمنا وخلاه
هذا كلامي نحكيه
مدي طّيح الشتا ترويه
ويكبر فبنيازغة نجنيه
ونصبحو حنا جيلالة

الله يرحمنا وخلاه الله يرحمنا وخلاه
عاشت بنيازغة حرة
بناسا وتاريخا غرة
جبالا وطهورا خضرا
وهنا سالات لمقالة

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »