قصيدة مانبقاشي موراك للشيخ بلعوين البكاري manabkachi morak - chikh Laaouine El Bekkari

بني يازغة الأربعاء, أكتوبر 28, 2015

مانبقاشي موراك الحبيب ديني معاك
نمشيو أنا وياك و لي جبتي يكفينا

من قلبي كانبغيك مانصبرش بلا بيك
كانبقا مخلوعة عليك خفت شي واد يديك
و حنا تسمح فينا 

مانبقاشي موراك الحبيب ديني معاك
نمشيو أنا وياك و لي جبتي يكفينا

مانبقاشي موراك سيري سكني عند يماك
سكني  فلخيمة دي باك و انا منقدرش ننساك
لفلوس لي حبيت جات راكي فنة و زوينة 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك و أنا مايغويني لباس
لاتشريلي زيف لراس لاتشريلي بيت النعاس
و أنت دي حبيتو خلاص يما تبدا تكسينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك راسي يا بنت الناس شاب
ديما فالخدمة و لعداب ماكنرضاشي بلصحاب
ماكنرضاشي بنساب
و شتكسينا يماك كانخاف وكان تعرينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك يما راها بفلوسا
و يما ماشي مخصوصة
يماك لي  منحوسة عليا ركبت السوسة
من نهار لي جبتوني و هي كتسحر لينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك يماك المعدن د السحور
كتمشي ديما لقبور خرجتلي عقلي بلبخور
كرشي ولات روروينة 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك يما راها بنت لحلال
و الكلمة عندا بالكمال حسن من عشرة د الرجال
غير أنت دي فيك لهبال بالهضرة صدعتينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك أنا مافياش لحماق
غير غويتوني بالزواق فقت بكري بلشواق
شريت النقلة دلسواق صبحتلي كرنينة 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك وأنت كنتي غير متلوف
مات كحضر ماكتشوف كيف الميزان بلا صروف
كيف الفروج على الرف
ماكتعلام حتى حصير علاش نطلقو رجلينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك من نهار لي درنا العرس
عندي عاد شبعتي اللبس ماتعرفي حتى تكلس
بحال لي جيتي من الحبس و حنا بيك تغرينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك جبتلك البراد و الطاس
و الصينية و عشرين كاس
و لبونجة و لباياص و حتى لوسادة دنعاس
و لهادشي قدينا 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك و هادي هي بنتو دي فلان
اليوم طوالك اللسان و رجعتي من لمدينة 

مانبقاشي موراك الحبيب ديني معاك
نمشيو أنا وياك و لي جبتي يكفينا


مانبقاشي موراك ياك باك تما كيكون
نعجة مسكين بلا كرون عمرو ماكيدخل شطون
ما كايسارا فلبيوت ماكايمشي للكوزينة

commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »