قصيدة "إهداء إلى سكان بني يازغة" - خالد الحابيط

بني يازغة الثلاثاء, يوليو 21, 2015

قصيدة للأخ خالد الحابيط، إهداء إلى سكان بني يازغة


قصيدة "إهداء إلى سكان بني يازغة" -  خالد الحابيط


بسم الله نبدا الكلام
نحمدوا الكريم العلام
شويش دالصلاة والسلام
على حبيبنا خير الأنام
شفيع الأمة والإسلام،
نحبوه ونصليو عليه.

*
كانحيي دوك الشجعان
دي تجمعوا من كل مكان
وقطعوا كذا من طرقان
هم فسباق مع الزمن
ماهو صيد ولا عومان
باغين الخير للبلاد
بالقراية والعلم يحثوا عليه

*
تحية لدوك الشخصيات
ديتذكروا فالموسوعات 
شهدوا شلا من فتوحات
المغرب كلو ملحمات
جاهدوا وحققوا بطولات
سبوعا كانوا فالغابات 
دي تعدا ليه ماليه.

*
بلادنا خدمات اوصلات
راسمالهاغير كفاءات 
مفرقين فجميع الجهات
فالمعاهد والإدارات 
رصيد قوي فالتحصيلات
غي شويش دالمبادرات 
وشي زعيم تعول عليه.

*
السي خالد يا بن حدو
كاتروم الناس لعندو مالقرنيات اللي قدو
والصغارين اللي بعدو عمرو مايبقى وحدو
فين ما أمر السلطان النحل مايسمحشي فيه.

*
كانغيروا من دوك الناس
الفهامة والحني دالراس 
كاتصيبم كلم حماس
الخدمة بالبالة والفاس 
مايهمم كلام الناس
يهزوا من الري ما يصلاح مايخنسوا ولا يختلفوا عليه.

*
اولاهي قضية
قبيلتنا تبقى منسية لا تنمية بشرية
ولا حتى شي جمعية دي تكون تعمل بالنية
تنوض تحارب لفساد حد فينا ما هو باغيه.

*
وخا قبيلتنا فقيرة
لقلوب صافية وكبيرة 
ومحافظة عل الشعيرة
مزال يسميو سميرة 
العدو ديالهم شاكيرة
حبوا الإسلام وكايدينوا بيه.

*
نبغي نضيف شي زيادة
تبقى البلاد فالريادة 
نصلحو شويش فالقيادة
مرة مرة شي زيادة 
والله ماتكون ليفادة 
وخاطري مغير يقدر يتيه.

*
بنيازغة ما يوصفا خيال
أحسن صورة فالكمال 
ها المناظر عالشكال
العيون والما دالشلال
والسواقي بين الجبال
كاتشوف الزين او تهبال
تنسى راسك ولا عليه.

*
شحال يا بلادي ولافة
أرض فريجة و مضيافة
دي شرب ماها يتعافى
ناسها عطاوها إضافة
كية دي ماعمرو شافا
ها الكتوبة ها الصحافة 
غير يجي يشوف بعينيه.

*
خليت بلادي أرض التوت
وهجرت لبلادات الخوت 
تما عرفت باللي مشموت 
مكاين ما احسن من تاغروت
نرجع للطهيور كانموت عليه.

*
آياودي وكانقول نطرب لتما
فاين الزين سكن تما
كايعيش فشان وهمة
الرجال فراس القمة
والعيالات حتى هوما
ها الحلال عطاه الله
وكان شفت الخير اللي فيه.

*
يا هلي يا هل المنزل
يا اهل الكرم والأصل
يرحبوا بكل اللي داخل
تكون گايز خاصك تنزل
كل خير أرى متاكل
يتهلاو فالبراني مايقدروش يسمحوا فيه.

*
شحال من كذا من مرة
ديت لوليدات ولمرا 
گزت من ديك المنجورة
ماوقفت حتى لشنشارة
شمن فواكه وخضرة
شفت تما خالي العزيز
شحال يبغي دي يوصل ليه.

*
ناس ملاحة يا لجواد
بين لجراف شحال بعاد 
خاصك تهبط بالمنطاد
ولى نتقب تجي فالواد 
شحال من خيرات ومواد
ها الملحة هاك هالعواد طيب الخبز وتبنن بيه.

*
گوز من تما للقصبة
الزياتن حبة حبة
رجالها غير الألبة
ها الطالبات والطلبة
الله يرحمك يا لعبيد كان معقول و ربي عاطيه..

*
مناين نبداك ادارحقون
حكايتك غامضة من قرون
واش نعبر كيف المجنون 
ولا نهضر بلا قانون
حكايتك تحير الحكيم ما يعرف راسو مرجليه.

*
شوف شهاد اولاد مكودو
كلها قابط حدودو
كلشي فرحان بعودو
مابخلش الله من عندو
العراصي هادو هادو
عطف المنان بجودو
سبحانو ما له شبيه.

*
اما صعيب هاد حرف الغا
الهضرة عليك يامطرناغة
قوة عالية فاللغة
اسلوب زين فالبلاغة
نيشان بلا مراوغة
منين كاتكون الملاغة
يعطيوك علاش كاتقلب و تشريه.

*
كان ماشفتوا كي وليت
من جبل مالو راني جيت
شفت داك الزين دي تاغيت
ماعرفتشي باش تبليت
عبالي عقلي تم النيت
طلعت شي كديات وشاليت
جاوبني بالسيف وصافيت
ماعرفت كيفاش نوصلو ، كلشي عساس وحاضيه.

*
گوز للسراغنة عاد وسير
كل الهندية والديسير
وتفجج المناظر
ناسها معروفة بالخير
الخدمة وما شغلم فالغير
الدعوة دالشريف بنعيسى ,كان رمز الدين وفقيه.




commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »