سرابة بكارية " أنا راني بنت المدون لا بالزين ولا بالعيون "

بني يازغة الأحد, ديسمبر 14, 2014




أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو
***
أنا راني بنت لمدون و مانديشي لعروبي
ولعروبي بو دربالة أها و ماعندو حالة
ويسكني ف نوالة  ويوكلني خبز الشعير
مرة خامر مرة فطير مرة ماناكل والو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون و مانديشي لعروبي
ولعروبي ساكن ف لجبال و مربي قوات لبغال
و يقيل يظفر ف لحبال يلقي الشكيمة و الشكال
هاديك الخدمة دلهبال دي كايعرف فشغالو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون مانديشي لعروبي
ولعروبي لاحوه لمواج ماقاري ماعندو سطاج
ومربي قوات النعاج ديما ف الغبرة ولعجاج
متلوف الري ديالو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون مانديشي لعروبي
ولعروبي ماعندو ڭراد خفت يسكني ف لبلاد
لا راحة فيها لا ڭعاد لا ف الحرث ولا ف الحصاد
ونحصلو حتى ف لولاد، واحد ماشي عريان و واحد رافد سروالو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون وكبرت وعشت ف الفشوش 
ما فيا عيب ولا خبوش
و نجي لقبيح أحلوش كيف ندير لداك لعيوش
دي ف التالي يبقالو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون مانديشي لعروبي 
ولعروبي بوطاڭية يسكني ف البادية 
تما نبقى ملغية يلقي الشهود عليا
يلا جروني رجليا لعند عمومي و خوالي
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون  يا ماما و ضبرلي ختار  شي راجل جيبيه للدار
 و يكون من الناس لكبار    أستاذ ولى كوماندار 
و يشوفو لبعيد و لجار عمرو مايعملي العار
و يكون مهني بالو
***

أنا راني بنت لمدون لا بالزين و لا بالعيون
يا دي كاتختاري اللون ها الرخى يغويك و تقول دابا الشروط سهالو

***
أنا راني بنت لمدون   يا ماما جيبي شي طبيب
يخطبني و نديرو حبيب  مايمشي عني مايغيب 
يبقا غير حداي قريب عمرو مايعملي العيب
و عــــــــــليـــــــــــا يــــخـــــــســـــــر مــــــالـــــــــــــو



commentaires
يمكنك التعليق هنا دون الرجوع إلى فيسبوك.

يوتيوب قام بحذف قناة بني يازغة المرجو الإشتراك بالقناة البديلة على الرابط التالي

موقع بني يازغة يهتم بالتعريف بقبيلة بني يازغة و كل ما يتعلق بها من اخبار و صور و فيديوهات. قبيلة بني يازغة تتكون الآن من : بلدية المنزل، جماعة امطرناغة، جماعة أولاد امكودو و جماعة عين تمـﯖناي

التالي
« السابق
السابق
التالي »