القائمة الرئيسية

الصفحات

قصيدة حاولو يا لبنات (المدونة) للشيخ البكاري chikh el bekkari


أ حاول أ لمرة و هضر غير بشوية  
يما خطيك عليها و بدا دير ريا 
راك تمشي ما بين الصبح و لعشية
ما يشدك عندي لا ولد لا بنية
ماشي صعيب عليا لبرا تجيك ف الحين

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

أ بانت الحقيقة و غدرت يا الغدار
فيك غير الهضرة ديما مقابل الدار
أ نوض تخدم و تصرف على ولادك الصغار
نتا ويماك بقيتو لا خوت لا جار
ما كاتغلبو غير عليا و عل المسكين

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

وا دير بكلامي ولى سير عند يماك
شحال من واحد جا خطب و مشا وخلاك
ما ندمنا حتى درنا الكاغط معاك
مصاب غير صغيرة مصاب غير شي زين

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

شحال من واحد جا عندي و مابغيتوش
أ كاندير الشان لراسي و بنت لفشوش
أ جيب لحليب لولدك جيب ليه ليكوش
أ عاند قرانك باراكا من التعرنيد

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

أ ضاعت الحياة ديالي الله يقبل
فين كانو عيناي و فين كان لعقل
حتى ديتك و صبحني كانعيش ف الذل
لوكان ما لولاد لي شركنا نبدل
و نجيب وحدة مازالا ماوصلت عشرين

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

أ ڭول ما هان عليك و زيد يا الشومور
ضغيا نسيت الخير ديالي شهدت بالزور
شحال من حاجة جبت و زدتها ب ليزور
ولڭيت عندك لخناشي عامرة بلعشور
أما حوايجك شهر ماشافو التصبين

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

خليت لبنات لي فنة و جبت لخلا
أ باينا غير من المشية و عاد شغلا
و إيلا دكرتا فحبابا كلشي ينعلا 
لوكان صبت لي يديها نبيع جملة
لغدايد ديالا باش رجعت للتدخين 

أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

أ غيتني يا لفقيه بشي حجاب ضغيا
نعطيك لحوايج دلمسخوط و السمية
وإيلا جا كايرغب هاديك هي الدنيا
يبدا يشاور بنتي يبدا يدير ريا 
و الأجرة دلخدما حسبا ميا ف الميا
وختار شي جدول باش تسدلو العينين


أ حاولو يا لبنات تصرفو بالعقل
اعتابرو لعڭوزة و عتابرو الراجل
قانون مدونة الأسرة تبدل
ولي ف شي دار تعنڭها بجوج يدين

أ حاول يا لمرا من لبهوط و الدسارة
ماشي الحيرة ف التكبر و الشطارة
أراك تطلع و تهبط معاي ف لبوارا
يماك منحوسة راه عطاوني خبارا
ماكاتوريك غير الشر و التشيطين

تعليقات